Ia o lena la o le a pisa mai, ai foi se toeaina o lena e ovasiteia iina lena na faaseā ane, e faafoliga mai o lea e tumu Saina iinei, ae sili atu ona tele le mau Saina lena ei iina i Aukilani, nai lo tamai Saina nei e inei i Samoa. O le lalolagi lenei ua tumu i Saina, ae masalo e lē atoa se to‘a selau o ni Saina mao‘i o lea ei iinei.
Radio Samoa: Ou te tau manatuaina sau saunoaga foi talu ai, i faletupe foi lea o le lalolagi o loo nofo aitalafu ai tatou, e tasi lava le mea o loo tilotilo ai, o le malosi o le totogi aitalafu. E lē taulia le tele o aitalafu, ae o le malosi o le totogi aitalafu.
O le tulaga la lea e fia fesigia ai lau afioga i le Palemia, e lē ono oo Samoa i se tulaga e mafatia ai pe afai ae tulai mai ia le Tautua ma le latou vaega faaupufai, ma latou gaioi foi lea e soloa tupe maua peitai foi ua faaletonu le togitogi aitalafu i atunuu i fafo?
Palemia: O le matuā telē o le faaletonu. Pau a le mea ia e tilotilo i tagata la e omai ai. O tagata la e omai ai, oka oka oka oka. Ua lava ai a iina. Ia e tilotilo i tagata la e omai ai, o tagata ua matuā ali vaavaa.
O isi na tutuli mai iinā i Niu Sila. O lea e lei atoa le taitolu masina o isi, ae o lea ua feosofi i totonu a o lea e iai le tulafono, e lē mafai ai ona fai lena mea, toe leai ni monotaga o fai.
O la‘u tali puupuu lena, o la‘u faamatalaga foi lena na fai ina ua faatalanoa a‘u iinei, e leai se mea e popole ai. Na o le pau a le mea o le tilotilo atu i foliga o tagata na e tutū mai o i le Tautua, ona iloa ai lea, o tagata a ua lauiloa i Samoa nei.
Radio Samoa: O la‘u fesili a lea i lau afioga i le Palemia, ia auā e pei lava o le lakapi, auā e leiloa lava le mea e fiki i ai le polo ia faapena foi ona manumalo le ‘au. Pe te‘i ua tulai mai le vaega faaupufai a le Tautua i le faiga palota lea; o le ā se lagona o lau afioga i le Palemia?
Palemia: E leai ma so‘u popole i ai. O lena ua uma ona avatu le matou faitau i le aofai o a matou sui. O le mea lea e aliali nei, o le matuā tele a o matou sui e sao mai. Ae o le mea lea ua agai i si matou vaega lena e agaia matou, pei ua alu ai a faapena. Ua tiga ona vaai atu e lē fetaui, ae o la ua alu ai a faapena.
Radio Samoa: Se‘i o ta talanoa la lau afioga i le Palemia, auā o se tasi lenei o gagana o loo gagana ai pea le atunuu, aemaise foi i latou pe a oo i le taimi e faata‘ape ai le Palemene ae sauni i le faiga palota.
I le taimi la lenei auā o lea ua ta‘ape foi ua leai ni tofi faipule ma tulaga faapena, e faapea e fai faapelepele lava e sui faipule soo se tagata lava, e ‘ata‘ata ma talatalanoa. Ae a oo loa ina tulai mai, ia ua vili loa i luga le tioata ma fai le mata uliuli ua lē toe iloa se isi. Poo tupu le mea lena i le tatou atunuu?
Palemia: Ia e manatua lelei, o le tagata a na te faia le mea lena, e lē toe sao mai le isi faiga palota. Ae o le tagata a ia e sao mai pea, sao mai pea, latou te lē faia se na mea.
Radio Samoa: O le ā sou finagalo i le toe foi atu o le afioga Le Mamea Ropati i le HRPP?
