Radio Samoa: O ai la le isi Sui Palemia lea o le a tulai mai e toe avea ma Sui Palemia pe afai e…
Palemia: E faato‘ā faatino le fuafuaga lena ina ua uma le faiga palota. Ona faato‘ā omai loa lea fai se filifiliga o se isi sui tulaga, e lagolago i le taitai mo le vaega totoe o le paeaiga.
Radio Samoa: O se fesili lava e tuu atu i lenei afiafi, lau susuga Tuilaepa, aisea lava e lē filifilia ai e tagata lautele o le malo se Palemia o le tatou atunuu, ia ae filifili e le Faafaletui, se Vaega faaupufai se Palemia pe a faapea e tulai mai?
Palemia: O o tatou faiga faavae a. E pei foi o Niu Sila ia, e lē filifilia telea e tagata o le atunuu, e filifili a le latou Vaega. O lea a la e mulimuli tatou foi i faiga masani, o faiga malo faavaega. E oo foi la a o lei filia le tatou vaega, a o lei faia ni vaega, sa filifili e le Maota. Ona alu alu lea ua matua ia faiga malo, ia ona fai loa lea o tatou vaega. Lea a la ua ogatasi a la tatou ma Niu Sila ma Ausetalia, e malo mai loa le vaega, ia o le latou taitai a, o ia lena e Palemia. A tuu foi la i se isi itu, o na a e filifili mai e le atunuu, auā o le tele a o faipule o le vaega e filifili mai, ia o lena ua tauala mai ai iina le filifilia o le latou taitai. Lona uiga la, o lea a e fai e le atunuu le filifiliga.
Radio Samoa: O le isi talitonuga o le Tautua Samoa party e faapea, a tulai mai, e latou te soloia tupe maua a le malo. Ua tele le aitalafu i atunuu i fafo o loo togitogi, ae ua toeititi omai Saina ma ave faamalosi o tatou fanua ma eleele.
Palemia: O se manatu faavalevalea tele lena manatu. Aemaise e na o lo‘u faamatalaina lava a i ai; o inā sau penitala? A 600 miliona toese le 28 miliona tala, e tatau a ona ova i le limaselau ma le fitusefulu ma le lua. O le tulaga lena o a tatou tupe o lea e maua, o tupe masani, ae lei tuua i ai i isi a tatou tupe mai mea o nogatupe māmā. E 28 la miliona tala e totogi atalafu, ia matuā laititi tele na aitalafu.
O le tulaga la lena o lea e tau fai ma ou faamatalā i le Tautua, o le matuā tele o tatou tupe ia e iai, e leai se mea e popole ai, i mea o nogatupe.
O kamupani uma a, e ala ona ola, o le nonō, o le o e nonō mai tupe e faatino ai, nai lo le faatalitali sei maua tupe atu i lafoga a tagata ona faato‘ā fai lea o mea. E oo foi ia Niu Sila, e faitau piliona ma piliona nogatupe a Niu Sila na e nonō ai.
O atunuu uma a o le lalolagi, e oo foi ia Amerika, e faitau tiliona, e lē piliona ae tiliona, aitalafu a Amerika o la e ola ai.
E leai se pisinisi, e leai se malo e ola pe a lē faia ni ana aitalafu, ae pau a le mea e vaavaai i ai, vaavaai i au tupe maua ma lou gafatia ona totogi aitalafu.
O mea na o lea e ola ai tatou. Ae lē mafai ona o mai fua le malo Saina, ia o ituaiga mea la lena, auā o malo uma nei o lea e i lalo o Malo Aufaatasi, o inā lea tatou te feiloai uma ai.
O le ala lena o lea e o ai leoleo a le malo Samoa, auai i savali o le filemu, i le mea lena e puipui uma a e Malo Aufaatasi le atunuu o le a osofai e se isi atunuu. Ae lē mafai e ni malo, o Saina o le matuā pele o tatou ia Saina, talu mai a nofoaiga talu ai, ona ua leva ona fai a tatou faigauo ma Saina. Ua e savalivali ifo iinā i Niu Sila i le anoano o mea na e faaigoa o China Town na e tumu ai le au Saina.
O le mea lena o lea ua tupu nei, o le lalolagi atoa a ua tumutumu i Saina. Aisea? E pito taugofie atu oloa e gaosi i Saina, e mafai ona outsell. O le uiga o lea mea, e mafai ona faasaga mai Saina, sasa soo se atunuu, i le tulaga o le taugofie o a latou oloa, ona o le toatele o a latou tagata e mafai ona totogi, i le na o le tasi, lua, tala i le aso e ola ai. E oo ia Amerika lale na o le tagi‘u‘u, ua lē taulia a latou oloa, ae na o Saina ua pito sili ona taulia a latou oloa.
O le malo Saina i le taimi lenei, o le malo lea pito sili ona maoa‘e a latou tupe maua i fefaatauaiga. Lona uiga ua ave uma a e Saina fefaatauaiga a le lalolagi. A o tou fai ma tou matamata ane i TV, na e fai ma alu atu ai le talaaga o mea na o fefaatauaiga, ua silisili a le malo Saina, ma ave uma e Saina tupe o fefaatauaiga a le lalolagi. Ia o fea la o le a momomo atu ai tatou? Si o tatou tamai atunuu a e maumau le taimi o Saina e mafaufau mai i ai. E iai le tausaga na ou talanoa ai i le isi Saina mai Niu Sila, poo fea o teu ai ana tupe.
Ae fai mai, ‘o a‘u pisinisi e fai i Ausetalia ma Singapore ma Saina, ae o le ā le mea ua e nofo ai i Niu Sila.’ O le ā le mea ua e nofo ai i Niu Sila? O la e faatū ai lo‘u fale, e maumau lo‘u taimi, o Niu Sila si tamai mea, e maumau a‘u tupe e tuu ai, e laititi tele.
Na o Ausetalia, o atunuu tetele na o la e teu faafaigaluega ai a‘u tupe. Ua e maua mai la? E pau a nai Saina ia e faavalevalea mai iinei, o Saina foi ia e o mai e tafafao, ae te‘i ua fetaui ai ma se teine Samoa, nofo ai ma faavalevalea ai a iinei.
Ae o Saina uma a la latou te iloa, e pito sili atu ona tele a latou pisinisi pe a o e fai i Saina ma o i Amerika ma o a‘e i Ausetalia. Ia e ui a la ina laititi Niu Sila, ae o lena ua toeitiiti a tumu tumu, ave uma mo mea o faleaiga Saina e tagata Saina iina i Niu Sila. Sa ou alu atu i le 15 tausaga talu ai, na valaau mai a‘u e le Iunivesite i Aukilani, ou te alu atu e fai le lauga, o le faauuga o tamaiti e mai i le A o latou igoa e tau i le F inā i Aukilani, tama ma teine.
Toeititi i la‘u mātau, pe ova i le afe tama ma teine mai le Iunivesite a Aukilani ua maua o latou Bachelor of Commerce. I le afe lena, ou te tau mātau pe a ma le toalima Samoa, lua Fiti. Pe a ma le toa sefulu pe luasefulu Papalagi, ae ova i le 950 ia Saina.
