O le agaga tonu a lena o le teuteuga lea o le tulafono i le 2006, o le faafoi pea o le tiute e tatau ona faatino e lē ua matai. Ia alu e fai ona tiute faamatai, fai saofaga i meafai a le nuu. Afai o meafai a le aiga, ia o lau a lena tautua i le aiga, pe te matai pe leai, ae lē ta‘ua lena mea o se monotaga auā e lē o se mea a le nuu, o le mea a le tou a aioga.
O le itu tāua tele lea, lona uiga e toe faafoi atoa ai le pule i alii ma faipule e aofia ai ma le pulenuu, nai lo le mea lea o lo ta tafao tafao a, ona oo lea i le faiga palota, o ta oso tuu lo ta igoa i totonu i i, ae leai sa ta monotaga o fai, ia o le uiga la lena o le tulafono.
Radio Samoa: O le fesili foi lea pei e tau faatūtū atu i lenei afiafi i lau susuga Tuilaepa, pe tatau ona lua ni nofoaiga a se Palemia. Ia ua lagalagā ona o manatu foi o le Tautua ma nisi foi ua faaalia, e ui la se finagalo o le taitai o le vaega faaupufai a le Tautua Samoa, a oo ina tulai mai, e tatau ona lua nofoaiga a se Palemia.
Ae o loo faatūtū atu nisi o ana saunoaga i lau afioga i le Palemia, na ia ta‘ua ai, ‘o le umi o se Palemia i le taitaiga o le Malo, e mafua ai lagona lē popole ma le lē kea’, vaeane lava lenei vaega o le afiafi, lau afioga Tuilaepa.
Palemia: O le mea mo‘i pei ua palaaai ia te au. O le mea lena, pei ua lē lavavā matou faafeagai, i le omai soo ma ou ta‘u atua a latou mea faaletonu la e fai. O le mea tonu lena, o le palaaai; e leai a se isi mea e mafai ona faamatalaina ai. O le tulaga la lena o lea na faasalalau, fai mai o le faiga faa-Amerika.
O se manatu vaivai tele lea manatu; o le aumai o le faa-Amerika e fai ai le faa-Samoa. O Amerika e selau ma selau o miliona le faitau aofai. A tuu ifo i le toatele o tagata e mafai ona fili ma fua mai ai ni taitai, e faitau selau ma selau o afe. E lei atoa se tatou luaselau afe i o tatou tagata. Ia o lena selau valusefulu afe lea e iai nei, poo le selau toluselau afe lea vaega ia o pepe e tau i taulelea e lei matai. Ia ona totoe ai lea o le limasefulu afe. Ia o lena limasefulu afe, pe luasefuluono afe o tina ma tamaitai, ona totoe ai lea o le luasefulufa afe, o matai, ia o mea la na e filifili mai ai o tatou taitai. Tuu mai le faiga vaega, ia o le mea la lea e iai nei, sa ou faapea e lē lotoe mai latou, e lē talanoa mai latou i lena mea, auā ua leva ona tau sue so latou taitai, e latou te iloa ai le faigata tele o lenei mea o le tau saili o se taitai.
E oo a la i le taimi lenei, lea a fai a latou fono, lea foi sa ou feulā anapo i le tulaga, ua saunoa saunoa le taitai o Vaai, uma ifō ua toe auai uma mai le isi toalima, lona uiga o le au fia taitai uma a. O la‘u la vaai, na ona uma a o le faiga palota, taupelu loa le aualii ia e tutulai mai, ona o la‘u vaai atu e fia taitai uma a. O le tulaga la lena o lea e iai, i lo‘u taofi ua uma ona faasalalau, o le mea lena e pule ai le Vaega. Afai a o le latou manao e taitasi, ia e tailua o le ā ae ua le lava se taitasi.
O le mea lea mo le taitai o se tagata, e lē o se mea a se latou aiga, o le mea e pule ai le Vaega. A fai atu a la le Vaega, e tasi, lua, tolu, fā ia nofoaiga, o le mea a lena e fai. Ae o le mea mo‘i lea ua tupu, ua palaaai matou te faafeagai.
Radio Samoa: Faafetai mo le vaega lea. O le tolu tausaga o le paeaiga, lea ua sui mai le lima tausaga.
O le suiga lea na sau ai le tatou atunuu, e tolu tausaga o se paeaiga ma toe fai le faiga palota, o lea ua sui mai le lima tausaga. O loo lelei lava le tulaga lea Tuilaepa?
Palemia: Ioe, o le matuā selau pasene, aemaise a pe afai tou te malo pea.
