Palemia: O lena ua uma ona faatino le iuga a le tatou Malo, e tapena ai mea ia e ave e tusia loa e le loia sili ma tuu atu i le Palemene i se fonotaga o lata mai, e teuteu ai tulafono o faiga palota, ina ia taataa mamā tagata, a fai loa a latou faaiuga, aua nei toe foi mai e faatino le galuega, auā o le mea mo‘i, afai o le tagata lea e tetee mai i le Malo, e alu e faasagatau mai, e alu i le itu e tetee i le Malo, ia ona uma lea o le faiga palota ae toe foi mai, ia talofa i lena tagata, e matuā faasiugutua e le Minisita o le a tofia i ai, pe a faapea e malo matou.
E lē lelei la mo le tagata lena. Ae afai foi o se tagata o matou o lea ua malolo a ua toe foi mai, ae sau se tagata o le isi vaega sa la tauva i se laisene ae teena e luga o se mafuaaga tatau, e tasi a le vaaiga a lena tagata ua polokikia le faaiuga. E te fiu a e faamatala atu o lea e amiotonu lau faaiuga, ae sese a i le vaai a le tagata lea, ona o oe lea sa e alu i le palota.
E tasi a la le agaga atoa, ia taataa mamā le Malo, ia aua ne‘i tuuaia e se tagata, o faaiuga ua aafia ai le isi tagata ona ua polokikia le mafaufau.
O le sailiga la o le amiotonu, o le mea pito sili a ona amiotonu, o le faamavae lelei ma alu ese, aua ne‘i toe foi mai i totonu. O le tāua foi o le itu lena, a manatu ai loa le tagata e alu i le faiga palota, ia matuā tuutuu loloto le mafaufau.
Nai lo le faatemeteme ma faatautala le tulaga o le oso i totonu, tau a ina alu, ona tiai ai lea o galuega a le Malo, ae alu fai fai ni faiga campaign, sau e lē manuia, ia ona toe foi mai foi lea, e lē o se tulaga lelei lena.
E tasi a le tulaga amiotonu i le vaai a le Malo, matuā faamavae lelei ae alu e fai au polokiki. Ma le isi mea, o lea e toatele isi mau tagata, e lē na o oe se galuega, e lē o se galuega foi na fau e le tou galuega.
Afai a ua e fia alu e fai au polokiki, tuu le galuega ae alu e fai au polokiki, o la e iai isi tagata o le matagaluega e omai e tauave i luga o le tulaga masani, o le talosaga ma fai a latou interview, ma filifili mai ai le tagata pito silisili ona lelei e tauaveina pea galuega. O le ‘au‘au atoa la lena o le mafaufau o le sailiga o le amiotonu.
O le mea foi lena i tulaga lava o faamasinoga, a oo ina lotea sau mataupu ae vaai atu i luga o loo saofai mai ai se tagata sa lua faamasino i se isi faamasinoga, e tatau a ona tupu a‘e lou mafaufau e fesiligia, ‘faamolemole aveese le faamasino lena, e lē mafai ona atoatoa lona amiotonu leaga o lea sa ma faamasino i le isi faamasinoga. Lona uiga a faaauau e ia, ia tasi la lea faamasinoga e lei amata, ae ua ou oti, ua ou faiaina.
O le tulaga la lena mo le sailiga o le amiotonu, e lē tatau ona toe foi mai i totonu. E lelei ona tatau a ona faamavae loa. Na ou faia foi e a‘u le mea lena o le faamavae, i le tausaga foi na ou alu ese ai a‘u. Faapena foi la i le susuga lea i le alii o le sui tauva o Lefau, lea e faamasino, na faamavae talu ai nei, ia na faamavae motu a.
Manatua foi o tulaga a o faamasinoga ia, afai e iai sina ou aafia i se itu, ia tasi foi lena faiga e fai, o le matuā faamavae motu a, ona talitonuina ai lea o le amiotonu ma le faatinoga e i latou e aafia ai.
Radio Samoa: Malo faafetai i lau afioga le Palemia. O le sui tauvā lea sa faamoemoe e tamoe mai le faaitu lea i Saleapaga, ia Tuula Kiliri, ua faaalia ai e le taitai o le Tautua, ua lē mafai e le Komesina o Palota ona talia le lesitalaina o le latou sui e avea na sui tauva, ona o se faatonuga mai le loia sili a le malo.
Ae fai ai foi lenei tulaga, ona o se faamatalaga mai le Pulenuu e faapea, e lē o faia se monotaga a Tuula Kiliri i totonu o le afioaga, o le mafuaaga lea?
Palemia: O le tulaga lena o lea e fai nei le faamasinoga. Ua molia e le susuga ia Tuula Kilifi le faauluuluga foi o faiga palota, ona o lana faaiuga e faavae i luga o le lipoti mai le pulenuu o Saleapaga, e leai se monotaga o fai. Ia ma o le vaega lena o le tulafono sa pasia i le 2006 e le Palemene lea faatoa mavae atu nei.
Ma o le agaga tonu a o le tulafono lena, o le itu foi lea o le amiotonu o le tagata o le a alu e suia le Malo, e alu o se tagata e faatuatuaina. Ae tasi a le mea e faatuatuaina ai, sa fai ana monotaga.
O le upu, o le ā le monotaga? O le monotaga, o lou sao lea i meafai a le nuu, faapea foi ma meafai a le ekalesia, e fai lou alofa fai lau taulaga. Afai foi e fai se galuega o le maota o le feagaiga ae saosao tupe, e te sao ai foi. Lona uiga o le mea lea o le monotaga, o le mea e faifai pea, i tausaga uma, tausaga uma, o lea e te matai ai.
E lē o se mea amitonu la i le tulafono, le leva ona e matai, ona e sau lea e tafaofao i Apia ma e nofo ai, leai sau monotaga i mea faalenuu e fai, leai sau monotaga i mea faale ekalesia o loo fai, ae o lea ua e fia alu atu e alu i le mamalu o le itumalo, ae lē o faia au tiute faamatai i le itumalo ma le nuu.
