Radio Samoa: Se‘i ta see mai le itu lenei, sei toe aumai lava sou finagalo i le faatauina o le SamoaTel i le 11miliona tala Amerika, poo fea lea ua fai i ai le mataupu lea, auā o loo fesiligia pea e le vaega faaupufai a le Tautua, aemaise foi nisi, pe aisea a lava ua faatau ti‘ai ai le SamoaTel, o se tasi o aseta a le atunuu?
Palemia: Leai e sese lena manatu o le faatau ti‘ai. E leai se mea o faatau ti‘aia. O le tulaga o mea faapenei, a oo loa lava ina faatauofo, ona faatauofo loa lea i kamupani e latou te o mai e latou te faagaioia. Manatua e lē o se mea foi lele e tuu i lau taga ia uaea ia ma e alu loa i se isi atunuu, e nofo a iinei mea ia.
Ae o le mea e tilotilo i ai tagata e omai e inivesi i Samoa, e vaai i le profitability. Lona uiga o le tulaga e aumai a latou tupe e faagaioi ae toe maua atu a latou tupe mai tupe e tufatufa o tupe maua. Lona uiga la, e toatele a tatou tagata ia e invest ai i totonu ii.
Manatua foi o le 25% o sea ia e alu i le kamupani a le malo, lea e tuu ai iina mo le omai o tagata lautele o le atunuu ma sao i ai, a o isi foi tagata ia e i totonu o le tauofoga lea, o o tatou tagata iinei, ia e iai foi ma isi aufaipisinisi i Tutuila.
A o le ‘au‘au atoa o mea faapenei, ia tele le tupe e mafai ona maua, i le vave faagaioi faapisinisi o se pisinisi, ona maua ai lea o seleni a le malo i le tulaga o polofiti e totogi ai lafoga, ia ma tele ai galuega a o tatou tagata e maua, ae lē gata i lena, o le pa‘ū maulalo ai o le tau o le faaaogāina o telefoni, ona e fai a sina taugata o le mea lea e iai i le taimi nei, ona e lē o vave le faatauvaga.
O lea la e tilotilo tagata i si tamai mea lea, ae galo le mea telē lea e agai i ai le malo, ia taugofie le tau o telefoni i tagata uma o le atunuu, e mafua mai luga o le tauvaga o loo faatino e kamupani tuma‘oti. O lea la e lei faia se iuga i ai, o lea faatoa fai i le aso 31 o Mati le faaiuga.
Radio Samoa: Ta see mai le tulaga o le faasā o taumafa i taimi o le palota, lea ua fuafua ai mo le faiga palota lea o le a iai nei. Ua fesiligia e le toatele poo le ā le mea ua faasā ai ae o le mea ua masani ai le tatou atunuu.
Palemia: O le mea lea o le tulafono ua uma ona pasia e le Maota i le 2006, lona uiga o lea mea na pasia uma a e le Fale. E tasi a le agaga e lei fesiligia foi e se isi, e tasi a le agag, ia taofi uma a mea e auala mai ai faatosina, ae tuu loa le tagata ia e fai lana filifiliga saoloto. Pau lena o le ‘au‘au atoa o le fuafuaga, auā e oo foi i taumafa, e ono fai ai a le mau ituaiga faatosina foi ia, ina ia o mai ai tagata e palota ia te oe.
O le agaga la o le Maota, ‘aua a ne‘i e toe taliu i si taimi lea puupuu o loo totoe, se‘i tuu ia tagata e o e fai o latou filifiliga saoloto. Nai lo le noatia i luga o faatosina, ae o le iuga o na faatosina o le oti ai o le tagata vaivai ae manumalo ai pea le tagata e maua tupe, e tele tupe.
O le tulaga la lena o se taumafaiga ina ia tau faatutusa ai le tagata vaivai ma le tagata malosi, matuā tapu uma mea uma, aua ne‘i toe faasaoina se faatosina i taimi ia o le a alo ai e fai palota.
Radio Samoa: O le vaega lea ua faatonuina ai e le PSC i latou uma ia o galulue i matagaluega a le malo e sauni e tauva i le Palota lea i le masina fou, lea faapea e sauni atu e faamavae mai a latou galuega, ae ua faaalia ai lo latou lē fiafia, sa tatau ona logo atu latou, poo le ā sou finagalo i lea vaega?
