Radio Samoa: Faafetai i le Atua o lea ua maua le fesootaiga ma le taitai o le tatou malo, le afioga i le Palemia, le susuga ia Tuilaepa Sailelei Malielegaoi. Malo le soifua manuia ma le lagi e mamā i lau afioga!
Palemia: Faatalofa atu foi le mamalu o la outou aufaigaluega, ma nisi o loo faafogafoga mai i le tatou talanoaga i lenei po. Ae lelei ona faagasolo loa i ni mataupu o loo fia lāgā mai foi e le tatou leitio.
Radio Samoa: Faamalo faafetai, o lea ua māua ua mae‘a le faiga palota laitiiti a si o tatou malo. Ou te talitonu ua mautinoa lau afioga i le Palemia, o lea ua avea sui uma ia e avea o le Palemene; e lē toe iai nisi faafitauli poo ni faamasinoga o loo tulai mai o loo faatalitali i ai, poo lea ua atoa tino o le tama, ma lo‘u faaaloalo faamolemole Tuilaepa.
Palemia: Ou te taofi ua oo i le tulaga foi lele ua ila foi tagata i nei mea o faamasinoga.
O le tulaga masani a, a uma loa faamasinoga ua pa‘ūū isi malo isi, ia ona toe alofaiva lea i le faiga palota, ia o le mea e tupu ua matuā ilove‘a.
Na o le pau a le mea ua tupu a‘e o le faatopetope loa o le faiga palota, ma soia loa le toe faia nisi moliaga. Auā o le mea e masani ona tupu, o le saili malo o itumalo. Lona uiga o lea mea, a uma le faiga palota tele ona iloa loa lea o le faiga malo ua tu.
O lona uiga e iai le taumatega pe a finau vaega tetele i le faiga palota lautele.
Ae uma loa le faiga palota lautele ua tulai mai le malo, ae toe tulai mai nisi tamai palota laiti i ni sui pa‘ūū, ia e leai se toe taumatega o le malo.
O le agaga saili malo a la ia i afioaga, tatou o loa e ave le tatou sui i o i le vaega lea ua manumalo. E leai se mea tatou te o ai e ave le tatou sui i se vaega tu toilalo, lona uiga na o le toilalo a la le tatou mea o le a fai.
O le itu faigata lena i nei mea o palota laiti, auā e iu ane a ua malo le Malo. Ia ma sa ou tautala pea i ai i lea mea a o lei faia le faiga palota. Ia lea a la ua tulai mai le sa‘o o le mau, ona ua lē tasi lē lua ae ua tupu soo, i le anoano o le mau faiga palota laiti ua tuanai.
Radio Samoa: O lea e molimauina mai nisi o tusitusiga mai nisi o nusipepa o loo ta‘ua ai le tele o aitalafu o loo totogi e le Tiute. O loo taumafai la le ofisa o Tupe Maua ma le Tiute e aoina mai ia i latou e lei totogia a latou tiute. O le ā se fuafuaga a le Malo, lau afioga i le Palemia i se auala e faafaigofie ai le aoina mai o le tele o tupe o loo owe ai nisi o le toatele o tagata, faamolemole?
Palemia: E iai le vaega foi lea e masani, e lē toatele e masani a ona tupu i tagata taitoatasi. Poo le taunuu mai o le taavale e $3,000 le tiute, ona totogi lea na o le $1,500 ma le talosaga foi lea, se‘i alofa le matagaluega e togitogi atu le isi $1,500.
O inā la lea e mafua ai mea faapea. Pei ua avane le alofa o le matagaluega i le tagi tagai atu foi o le toeaina se‘i totogi auauai, ma mea ua sau ai a ma le taavale, galo le $1,500 lea e totoe.
E tupu soo a la mea faapena, ona liliu foi lea o le Matagaluega se‘i mai le taavale pe molia i le ofisa o leoleo.
Ae o le tulaga masani a lena e ala ai ona tulai mai mea o tiute lē totogia, e pei ua avane le alofa o le matagaluega o le tiute, ma mea ua solipala ai foi e i latou na o atu e talosaga.
O isi e matuā fetagisi a i luma o le minisita poo luma o le pule sili. Ae na ona maua a o le mea lea na manao ai, solasola loa e fiu le mea e tusitusi i ai. E iai foi la le tagata foi lea ua hire e alu e fai mana galuega.
O le isi la mea lena e fai e le tagata lenei. Na ona logo atu a ua faasalalau o tou igoa, ia pei ā o le ā le vave mai e totogi se vaega, ia ona galo ai foi lea. O uiga a na o lea e fai nei.
Radio Samoa: Talitonu o lea ua māua mai foi se lipoti mai si o tatou nuu tuaoi i Amerika Samoa, o loo moomia mai se fesoasoani mo ni o tatou fomai mo le latou foi maota gasegase i Amerika Samoa. Mata e lē o se luitau foi lea mo i tatou i le matagaluega o le soifua maloloina, pe afai e amata ona mananao nisi fomai e agai i Tutuila e galulue ai aemaise o le ofoina o ni totogi tetele, a o loo utiuti foi le tulaga o fomai i si o tatou foi maota gasegase. Se‘i saunoa i ai lau afioga i le palemia, Tuilaepa?
Palemia: O le mataupu lea na aumai e le alii faipule na sau i le fono a le latou ekalesia foi lea Faapotopotoga a Iesu. Ona sau ai lea talanoa ia te au, ae te‘i ua sau i le TV. Ae lē o ala ia o mea.
O ala o mea, e fesootai le Malo i le Malo. E lē mafai ona nofo nofo a le faipule iinei, alu atu talanoa ma le Malo i Niu Sila, i ni mea e manao ai le malo Samoa.
E tasi a le faitotoa o le auala atu i le Palemia poo le minisita o le Va i Fafo. Ae o le sese la lena o le mataupu a le senate poo le faipule lea, o le sau oso i le TV ona faasalalau ai lea o ona manatu. E iai foi la e faaeteetega i mea faapena auā afai e sau ia ona faasalalau lea o ana talosaga, pei e foiga mai ai, e leaga tele le Kovana e lē mataala i mea ia. O le tulaga la lena e lē mafai ona ou faatāuaina le talosaga.
Radio Samoa: O le lagona fiafia faafetai o lea ua māua ua tatala foi se tasi o ofisa fou, latou te iloiloa vaega tau tagata faigaluega ma agavaa ia e moomia o tagata faigaluega.
Ou te talitonu lau afioga i le Palemia, o se tulaga lea ua leva ona tatau ona oo i ai tatou. Ae faafetai foi i le saili malo o nei tamalii, e pei foi ona tulai mai ma tatala lenei ofisa, o le a lē toe iai se photocopy foi lele pe lomia pepelo ma avatu ma talia e matagaluega ia ma faafaigaluega tagata foi ia e lē agavaa. Se‘i faalautele mai faamolemole lau afioga i le Palemia lea tulaga?
Palemia: O se taumafaiga foi lena a se tasi o Mafine e faatu lena pisinisi. O le tāua o le mea lea, e mafai ai ona a manao se matagaluega e fia hire se tagata o iai se tomai faapitoa, e mafai ona fesootai ma le faalapotopotoga lea, e latou te saili maia tagata ua faamaonia ua pasi atoatoa i se mataupu. E te manatua foi o le tele o isi tagata faigaluega maualuluga e maua mulimuli ane, e lei iai ni a latou pasi.
O pasi na nonofo a latou ma gaosi mai totonu o computer ae lei pasi ni PA leai ni MA leai ni PhD. E tupu soo a iinā i Niu Sila i le tou malo.
Na iai foi le tamaitai lea sa failautusi faapitoa ia Helen Clark, o Thompson, lea foi na aveese aloaia ai ona ua maua atu, e talapelo e leai sana Doctor na maua mai o i Peretania.
O le aogā la lena o faalapotopotoga faapea e fai ma latou tiute tauave le o e siaki i iunivesite poo tusia mo‘i ai se igoa o se tama poo se teine ua talosaga i se galuega. O le tulaga la lena o galuega faapenei e aogā i ai faalapotopotoga faapenei.
Radio Samoa: O se tasi o a ta mataupu, o loo faatupulaia pea le tutupu mai o ni tagata foi ia o loo latou faaaogāina ni masini poo ni computer e lolomi ai tupe pepelo. O le ā se tulaga ma se faamalosiau o le a mafai ona taofia lea faafitauli, faamolemole lau afioga i le Palemia?
Palemia: E fai a ma maua. E lē umi a ae maua ma ave i le falepuipui. Ae o uiga a ia o tatou foi, e leai a se mea e ese ai ma le gaoi. Gaoi tasi, gaoi lua, sao loa a, na o le fai soo, fai soo. Ae o lea a e fai ma maua.
Radio Samoa: O le tulaga i le matagaluega o leoleo. O lea ua māua mai le tagata lea na lolomiina le tupe. Ua uma ona aveese lona passport, ua iai foi lona puipuiga e lē mafai ona alu ese ma le atunuu.
A o lea ua māua ua sola ese mai le atunuu, o loo ua i Amerka Samoa. Sa faafefea ona sao mai lea tulaga, a o lea ua i le ofisa o leoleo lona passport?
Palemia: E tele a mea faapena e ono tupu. E ono tupu a foi lele, e lē faapea e tele ni tagata, ae iai a le tagata e mafai ona sao. O le mea a lea o le togitupe o se leoleo poo le togitupe o se tagata o loo faigaluega i le ofisa foi i o i Faleolo, ae e maua a.
Manatua foi e leai lava se mea e faia i le pogisa e iu a ina susulu atu i ai le malamalama. Ae o galuega na a le alii o le lalolagi. E lē mafai a ona taofia na mea, o le ala foi lena e tatou te iloa ai foi le paoā tele o Satani ma ana ‘au, o faaosoosoga na e tutupu a i aso uma.
Radio Samoa: Faafetai. Tuufesili nisi i le hotel foi lea na faapea e fausia e Saina e 500 potu. O le ā le tulaga ua oo i ai, ae o fea tonu i faamoemoe i ai? Ae o le isi foi faletalimalo lea e faapea e ta‘ua mai o le a faatuina i Fagaiofu i Falelatai. E lē o manino i ai, se‘i saunoa i ai lau afioga i le Palemia?
Palemia: O mea faapena, o ala a o mea, e o mai matamata, fai faasalalauga, toe o toe mafaufau, ia toe omai toe matamata, toe o fai latou faasalalauga, toe nofo nofo ma mafaufau. O la e iai nei a i le tulaga lena, o le toe nofonofo ma mafaufau.
Radio Samoa: Malo faafetai. Ou te talitonu e lē o po se silafia i lau afioga i le Palemia aemaise foi le mamalu o le atunuu, le faasalaga lea ua tulai mai le kalapu lakapi a Nuuuli i Amerika Samoa, o se faasalaga ua mamafa tele, lima tausaga e tapu ai e lē toe taaalo.
Ae maise le $5,00 tala Amerika Samoa, aemaise e lē toe taaalo tama taaalo i le olaga atoa. O le ā se saunoga foi, se finagalo o lau afioga i le Palemia i lea tulaga?
Palemia: E lē mafai, lē mafai ona lelei le lakapi i Samoa, pe a lē matuā faasalā tamaiti faapena e fufusu i luga o le malae pe latou te fasia le laufali. Ua matuā ou fiafia a i le faasalaga ua fai, ona o a‘u lea na toai mai i ai le faatoesega foi a le Kovana.
E iai mea faapena na tutupu foi i le matou foi aulakapi, le iuni lea a le Apia West a o ou taitaifono ai ma ou peresitene. E tolu vaiaso o faamisa pea tama e toalua. Ua fiu le mea e faatonu, a o le faalavelave lena, o tamā o tama uma ia, e i totonu o la‘u komiti faatonu.
O le iuga na oo i ai, na soloia i le aufuefue le aulakapi a le pitonuu lea e tu tonu ai le malae, e oo i le faavavau e lē toe faatagā se latou aulakapi.
Lona lua, ua faasā ma tamaiti ia e toalua ona toe taaalo ma ou logoa foi le iuni faatina. Faatetea ai ma tamā o tama ia mai le iuni.
O le tulaga lena, a lē mamafa faasalaga o tama taalo leaga, e lē mafai ona alu i luma le taalo a a tatou tamafanau.
Radio Samoa: Faafetai tele lava lau afioga i le Palemia, ua manino ma matagofie lenei po i le faafofoga a le mamalu o le atunuu.
O loo tou faafofoga mai i le faatalatalanoaina o le taitai o le tatou malo, le afioga i le Palemia, le susuga ia Tuilaepa Sailele Malielegaoi.
Ou te talitonu ui lava ua loa atu foi le malo a le Manu Samoa lau afioga i le Palemia, ae toe momoli atu le faafetai tele lava auā o lea e silafia e le atunuu, o loo e taimatalii ai foi i le taitaiina foi o le asosi o le tatou lakapi a le Manu Samoa. Ia tatou faamoemoe i le Alii e maua ai le malosi o tama. Ae momoli atu ai le faafetai tele lava.
O lea lava foi o loo faapena foi ona opogi foi le faamoemoe sailiga tupe iinei i Niu Sila aemaise foi nuu tutuaoi, o loo taumafai lava ona logologo puialii le mamalu o le tatou atunuu, ina ia opogi mai lo tatou faamoemoe.
Ia ae ta te lei taumavae, o ā nisi o galuega faamolemole, ua faafesili ai lau afioga i le Palemia, o loo faagasolo i lenei vaitaimi i totonu o le Palemene auā o lea ua atoa tino o le tama, o lea ua mae‘a foi palota aliti, e iai ni polokalame faataotooto?
Palemia: E lei fono le Palemene faato‘ā fono i lea vaiaso. Ia o lona uiga la o ta talanoaga e mulimuli ai, ia o le a faapena foi ona agai i ai se faamatalaga.
Ae o lenei itula, o lea ua mātau atu, ua uma fesili sa e fia aumaia, ia ua lava ia lea ae faia se ta malologa, ia soifua ma ia manuia.
