O le tulaga ia o le ave o le faaaloalo i tagata e tatau i ai le faaaloalo. Sa leai a ni tulaga faapena i ia aso. A alu atu a le taavale a le Malo e fealuai le minisita, e leai a se isi e pisa. A o nei aso, ua tele naunau le lotoleaga o le mea lea e iai nei. E oo uma a i malo uma, e lē mafai ona savali se minisita e alu i o i le galuega ae feoai le toatele i taavale.
O le mea faavalevalea lena o lea e iai nei.
O le laititi ifo a, faitioa tagata i le minisita. O lea e galue le minisita mo le manuia lautele o le atunuu, ma o se mea pito sili ona faavalevalea le iai o taavale a le Malo, ae mananao e savali i lalo ma aua ne‘i alu i se taavale. Ma o le taavale foi e tatau ona alu ai, o se taavale ia lelei, faafaigofie ona fealuai ai i meafai a le Malo, aemaise le faatinoina o ona tiute.
Radio Samoa: Talitonu ua toe tasi la‘u fesili, ia ona lafo atu ai lea foi i sau saunoaga faaiu foi i le ta mafutaga foi i lenei po, ma agaga faaaloalo.
O le ata lea o le Survivor lea ua māua ua toe malo ai Samoa. O se tulaga faafiafia ai tatou i le tulaga lea ua toe malo ai Samoa, i le tulaga lea pe a faataunuuina nei ia Me poo Iuni e toe pueina ai le ata lea i se mea o Samoa, ma le faaaloalo.
Palemia: E lei oo i le taimi e fai ai le faaiuga. Lona uiga o lena mea, e lē mafai ona talanoa i le taimi lenei, o loo iai aiaiga, e lē mafai ona faalauiloa e le Malo, seiloga e oo, e iai le aso o Me, ona e lē na o Samoa lea e fai ai le filifiliga. E iai foi ma Tonga.
O le mea foi la lena o lea e iai i Tonga, e aua ne‘i faasalalauina se mea e tasi, se‘i oo i le aso ua tuupouina e faasalalau ai, ona faato‘ā mafai loa lea ona faasalalau.
E oo mai la i le taimi nei, e leai a se upu a le Malo o agai i ai i le mea lea, ina ne‘i te‘i ua televave le fia tagata, ae uma ane ua leai se mea e maua.
O le tulaga la lena o lea e taoto ai nei, ia ma e faamalo atu i le valaau mai i lenei itula afiafi. O lena foi ua mātau atu, ua leai nisi fesili o loo totoe, ae faamalo tele atu i lenei po ma le valaau mai, atonu foi ua iai se aogā o lenei polokalame e malamalama ai nisi o mataupu o loo faafatuulu i finagalo foi o nisi o loo faafogafoga mai i le polokalame o lenei po. A o lenei taimi, ia faasoifuaina le mamalu o le atunuu.
