E lē gata la i lena, a o le tulaga foi lea ua oo a i le ta le 8 ta le 9, o la e malamalama.
Ma o le taimi foi la lena o la e te galue a i lau faatoaga e te lē o sau i tai. Lona uiga e lua mea tetele a e aogā, o le tulaga o le tagata lea e tausisi a lona taimi, e ta loa le 10 moe, e matuā manino ai lelei ai inā le telē o le fesoasoani i le tagata, ona o lea ua fesuiai itula.
E lē gata i lena a o le umi ona e galue i lau faatoaga. Lea la faato‘ā toe suia nei foi, auā na suia faatasi tatou ma outou iinā foi i Niu Sila, ia o lea ua toe foi i tua, ia lea foi ua toe tulai mai i le mea sa masani ai.
O le tulaga la lena, o le faalavelave o nei mea, e lē o mafaufau loloto tagata i uiga e ala ai ona fai e le malo ia nei mea. Na o le o foi lele ma taumafai e fesili fua i isi tagata, ae e te fesili ifo a oe ia te oe. E lē tau fesili fua i isi pe o ā mai, o le ā se mea na tupu, poo aogā poo ā, ae te fesili ifo a oe ia te oe, poo le ā le aogā.
Radio Samoa: Tatou o ia i le tulaga o le sā o minisita. E iai se tulaga ua suia mai ai foi poo le tulaga sa iai muamua, o lena ua faapea ua lē mafai ona toe faatauina e le minisita pe a mae‘a le taimi o le taavale, ae o le a faapena ona tuu atu i luma i le vaitele e soalaupule mai ai le tau. Se‘i e saunoa i le tulaga lea faamolemole.
Palemia: Na o le pau a le tulaga foi lea, o le minisita ua pa‘ū i le palota ua lē toe alu atu i totonu, e mafai ona ia faataua lana taavale.
Ae o le faatau foi la o le taavale, e fua a i le tau o lea e tatau ona iai, i le fua lea i tausaga le umi, ia faapea foi ma le tulaga foi lele, ua me‘i ifo i lalo le tau i le maketi, talu ai ona ua faaaogā.
Ou te nofo a ma ou mafaufau i ai, tusa o se avanoa lea e mafai ai ona vaavaai foi le minisita ia, e teuteu lelei le taavale, aua le soona faaaogā a o minisita, auā a oo i le taimi e nofo ai ma le tofi ua pa‘ū ua lē toe mafai ona sao mai le palota, ona aogā loa lea o le teuteu lelei ma le faaaogā lelei o meatotino a le Malo.
E lē faapea e okometi, seiloga a ua e manao oe e faatau ona faato‘ā mafai lea ona e faataua. Ae ia te au a ia, sa aogā le mea lena a o lei suia le tulaga o taavale ma le itu taumatau o loo tu ai nei ave o taavale. Ia te au ia, e sili mamao ai a lo ta alu e faatau sa ta taavale, nai lo ta toe nofo ma faatau le taavale lea sa ta fealuai ai.
Radio Samoa: Selau afe, poo le ova atu i le selau afe i le sā e tasi poo le taavale e tasi. O se tupe telē lea. O le ā sou finagalo i lea itu faamolemole. Afai e faaalu ai le selau afe poo le ova atu i le selau afe i le taavale e tasi, o se tupe itiiti poo se tupe lapoa?
Palemia: Ia manatua foi o le tau lena o taavale. Manatua foi o le talā Samoa ia ta te talanoa ai, ia ona e fua lava lea e oe poo se tupe laititi poo se tupe lapoa. O le tulaga, e lē mafai ona alu se minisita i se taavale pe. O le mea lea e tele ina lē malamalama i ai tagata, ae mafua mai i le leaga o loto.
E tatau ona fealuai le minisita i le taavale lelei, a alu asiasiga, ia vave ona oo i le mea o lea agai i ai asiasiga.
