O le tulaga la lena e iai le isi nofoaga lena e i uta i Manukau ua iai le faamoemoe e faatau foi e le tatou malo mo le fausia ai o ona ofisa mo le agai atu i le lumanai. Fai a si mamao tele i tai, ae pei o tulaga lena o lea ua agai i ai le atunuu, o atina‘e fou ia ia o eleele iinā i Manukau City.
Radio Samoa: O se tala foi na faalogo i ai, poo tusitusiga foi, faaalia le atugaluga o le Amepasa a Saina i Samoa, talu ai foi lagona faaseā o le Peresitene o le faalapotopotoga o le au faipisinisi, poo le afioga ia Lemalu Sina Limā.
Ia ae ua maua ai foi se lagona o le Amepasa e faapea, ua faatupulaia ai foi tagata faipisinisi a Asia. Ia faapea latou, o le a faapopole ai foi le atunuu o Saina, ne‘i tutupu mai foi ni faalavelave e lamatia ai foi o latou tagata i Samoa.
Palemia: Mo mea o manatu faavalevalea uma a na manatu, lena sa faalauaitele atu i fafo. O le mea foi lena o lea, e iai a o tatou tagata o loo taumafai e faatupu vevesi, i lena foi mataupu, e faamaimau ai fua le taimi ta te talanoa ai.
E oo foi i le Observer, e iai foi tusitusiga a le Observer ia, ae nanā ai tua le mea o le faailogalanu.
Manatua foi o uiga ia sa tatou faia; sa tatou faia i le 50, 1960, 1970. Sa tatou vaaia ai nai toeaiina Saina o feoai solo ma tatou ato tetele e amo e faatau ai a latou fuamoa. Sa vaai maulalo a iai o tatou tagata i na taimi ma faaigoa mo mea o Saina megi.
Lea foi la ua ou vaai atu, o lea foi ua toe tau agai mai, i le tulaga o le vaai maulalo o isi i fanau a Saina na ua tu maualuga ma ua avea ma nisi foi o tagata maumea i totonu o le tatou atunuu. I lo‘u a la taofi, e leai a se matuia o a latou pisinisi o loo fai nei.
O le mea moni e pito sili atu ona tele tagata faatau o la e o e faatau mai ai ona o le taugofie. E lē gata i lea, ae maua uma ai a mea e te manao i ai. E tolu a la fale tetele, faleoloa ia e talanoa ai, o le fale o Amau, o le fale o Frankie ia ma le fale o le ‘au Westurlund, o fale pito tetele na i le taimi nei.
E iai foi ma nai tamai Saina e fai nai a latou faleoloa, a tele poo le luaafe talā le tau. Ia ou te lē iloa poo le ā le mea e saga pisapisaō ai i nei mataupu, se‘i vaganā o le faatupu o le manatu fefe ae o lea e nanā ai i tua le mea o le vaai maulalo i tagata Saina, poo ‘afa Saina.
E ala ona ou ta‘ua atu le mea lea, ona o loo fai ma ou tilotilo pea i le tele o nei mau mafaufauga lē faavaea e aumai, na o le faamaumau ai o le taimi e mafaufau i ai.
Radio Samoa: O lea ua atoa le 6 tausaga talu ona faia le suiga foi o le Daylight Savings i Samoa. O le ā se lipoti o maua mai, o aogā le suiga lea o le faaitiitia ai le power mo tatou tagata i Samoa, faamolemole a Tuilaepa?
Palemia: E telē a le aogā. Manatua foi afai o oe e masani ona e moe i le 10, sui loa le taimi ae o la lava e te moe i le 10, ae lea e tusa o le 9 lea ua e moe ai, o lena ua atoa le itula o sefe lou eletise, i po uma a mo po nei o masina e 6 o le tausaga.
