O lea ua māua le faatuina o le Komisi o Fefaatauaiga a Samoa i Niu Sila nei, e pei ona malaga mai foi se tasi o au minisita. Faamolemole lava Tuilaepa, pe mafai ona e saunoa lau afioga i ni fuafuaga lata mai a le Komisi lea mo se lelei atili o fefaatauaiga i le va o Samoa ma Niu Sila.
Palemia: O le tulaga lena o loo galue ai se tasi foi o tamalii iinā i Niu Sila, i tulaga lava o fefaatauaiga. I le taimi nei e pei ona silafia, o le tulaga lava i maketi i Niu Sila, o loo lava ma totoe i le tulaga o le talo; faigofie lava ona faatauina soo se talo e alu atu i Samoa nei i totonu o Niu Sila. E oo foi i le fa‘i; pau o le tulaga o lea ua faatāua fa‘i misiluki, ona o fa‘i palagi foi e lē o ni fa‘i e faigofie ona toe totōina ma togafitia le anoano o faamai o loo mama‘i ai fa‘i palagi.
A o le misiluki ia, e leai se tulaga faigata, e lē ma‘i gofie le fa‘i. E oo foi la i isi a tatou oloa fia faatau, e leai a se afaina, se‘i vaganā le tulaga o le production side poo le supply, o le itu tonu lena o lea e telē ai le faafitauli, ona e lē o mafai ona faamalieina le tele o mea e mafai ona avatu e faamalie ai le maketi telē o loo iai i le taimi nei iinā i Niu Sila.
Manatua foi e taofia le talo i le tausaga e 1993 ina ua aafia i faama‘i lega, ua oo tatou i le ta‘i 10 miliona i le tausaga le tele o le talo e mafai ona tatou aveina atu i fafo. I le taimi nei, masalo na o le 600 i le 700 afe le telē o le talo lea ua mafai ona faatauina atu. Ua maua nei le talo lelei, ae o le faalavelave lena, e lē o tele tele ni to‘aga ua mafai ona faia ai.
Radio Samoa: A o tatou iai i le mataupu lea lau afioga i le Palemia, e mafai ona fai sau saunoaga, auā e pei lava ona māua foi, poo tausaga ua mavae atu, o loo sailia se fanua o Samoa i Niu Sila. O le ā se saunoaga i lea itu. Ua iai se fanua ua matuu mai mo Samoa auā foi meafai e faatū ai se Maota poo se Malu foi i totonu o Niu Sila nei.
Palemia: O lena ua uma ona faatau le fanua, iinā i Mangere. O lena foi ua faagasolo le fausia o le maota o le tatou Konesula, o lena o loo faagasolo i le taimi nei.
Ae se‘i mae‘a ia ona fausia fale, ma tulaga foi e tatau ona tapena i ai, ona faasalalauina foi lea mo le asiasi atu i ai o le tatou atunuu e mataituina foi eleele na ua faatau e le tatou Malo, mo faamoemoega la e pei ona talanoa muamua atu ai i tausaga foi ua tuanai.
E iai ma le isi fasi eleele lena e iinā i Manukau, e tu tonu i le mea e iai faleoloa, ma le faamoemoe e fai ai le tatou Konesula foi, ua fai foi si mamao tele i tai o tatou maota na o loo iai i le taimi lenei.
