Ua toe taliu manuia mai i Sini Ausetalia le susuga i le faifeau ia Ps Vili Aufai o le Ekalesia Grace Point i Fairfield ma sui o lana Ekalesia na malaga atu mo se galuega tala‘i i le talalelei i le pitonuu o Kerala i Saute o Initia. Na malolo le latou faigamalaga i Kuala Lumpur i Meleisia a o lei tuusa‘o atu i Initia. I se faatalanoaga ma le susuga a le faifeau na ia ta‘ua ai, sa ia fautuaina le latou aumalaga e lē o se tafaoga le latou savali.
O Initia o se tasi o atunuu faigata i tu o tala‘iga ona o le tele o tapuaiga eseese e pei o le Hindu, Musalemi ma isi tapuaiga. Na molimau le susuga ia Pastor Vili Aufai, o se avanoa lelei lenei na o latou faasoa atu ai i le mana o le silisili ese ma lona alo o Iesu Keriso. Sa vaaia foi le suiga mālie o tagata sa latou faasoa atu i ai le tala lelei.
O nisi o a latou galuega faasamaria na faia, e aofia ai le asiasi i aoga ma saunia taumafa mo fanau. E lē gata i lea na o latou faataitaia le pusaina o le umu Samoa e faaitiitia ai le faaaogāina o le suavai paipa lea e utiuti i totonu o le atunuu. Sa ofaatasi nei galuega ma le faasoaina atu o le afioga a le Atua.
Sa avea foi lenei malaga ma itu na faapupula ai i latou na malaga atu i Ausetalia nei, i le faamanuiga o loo maua i Ausetalia nei. Sa latou asiasi foi i se nofoaga o tagata ua latou faaigoaina o tagata ‘Lē Tagofia’ (untouchables).
Faaalia e Ps Vili Aufai, o nei tagata ua leai so latou faamoemoe i le olaga nei ae faafetaia le talalelei ua iai so latou avanoa mo se olaga fou i le isi soifuaga.
Sa faigata tele le faamavaega ma nai auauna a le Atua o loo galulue i Initia lava, faapea nai mamoe ua liliu mai mo le Alii.
