O le susuga Joe Failua o se tasi o tamafanau a Samoa ua lauiloa i lana taleni o le musika e pei ona faafofoga i ana pese i luga o alaleo poo leitio.
O ia sa fatuina ma tusi se tasi o pese ua talanoa i ai le toatele o tupulaga e fiafia lava latou i fatuga faasamoa lea e faatatau i le tauga apu a le tamaitai o Susana na alu i Niu Sila ae tupu ai le faaletonu, ina ua nonofo faapouliuli ma le tamaloa sa taitaia le tauga apu ae ua galo mai lona toalua ma le fanau i Samoa.
O se pese ua faamatalaina e Joe na mafua ona ia tusia ma tuu i ai le fati ona o se mea moni na tupu i Niu Sila i se tasi o aumalaga tau apu.
“O le moni o la‘u faamatalaga ona e uma ona faasalalau le pese i leitio ae tuu vili mai tagata pe o le pese e faatatau i le mea na tupu i le au tau apu a le latou aulotu”. O isi ua vili ane i le alii pese pe o lana fatuga e agai tonu i le teine o le latou nuu lea na alu e tau apu ae maua tala e lona toalua ua nonofo ma se isi alii e nofomau i Niu Sila.
Fai mai le alii o Joe e ui e faapea e moni lava le mea na tupu ae na ia manatu e taua lona fatu i ai o se pese ina ia fai ma lesona mo le itupa o alii ma tamaitai e maua avanoa i galuega faavaitaimi, ae o atu ma le toe manatua mai nai tautoga ma fanau o loo tapuaia o latou faiva.
“E le fou lenei faafitauli i le va o ulugalii, ae a tatou nofoai e le faia i ai se togafiti e tupu pea ma sosolo ma aafia atu ai ma a tatou fanau pe a oo ina matutua ma faiaiga”.
O le pese o le tauga apu o loo faaaoga ai ni suafa e le moni e pei ona faaalia e Joe Failua, ae o le tala e moni ma ua mafua ai foi ona fatu e nisi o tagata pepese ni tali e foliga e faafetaui ai upu o le pese muamua o le tauga apu na fatuina ma tusia e lea alo o le atunuu.
Faaalia e Joe o Niu Sila e sefulufa tagata na latou fatuina ni tali i lana pese ae peitai o ia tali uma e le o maua ai le agaga moni o le mea na tupu ona e leai se isi e silafia le mea na tupu.
“O le mafuaaga lena ua ou toe tago ai fatu le tali o le pese ma faailoa ai le mea na oo i ai le faaletonu o le tauga apu a Susana”.
O le Aso Tofi 3 o Me 2012 na amata faalogoina ai i luga o leitio le polokalame fou o fatuga a Joe Failua ua iai ma le tali i le pese o le tauga apu ae o le vaiaso o faatauga o le Aso Sa o Tina o le a faato‘ā faalogoina ai i leitio i Niu Sila ma Amerika Samoa. O le susuga i le alii pese ua aumau nei i Aotearoa ma lona aiga.
