Ua avanoa nei mo le faitau a fanauiti a le Pasefika, le uluai tusi o ni tusitusiga ua amata ona tapenaina e le vaega a le Papa Tales. O le uluai tusi ua faaulutalaina “My First Fa‘aipoipoga”.
O le tusi muamua lenei o loo agai le faamatalaina e fua i mea na manatua e se tamaitiiti mai le uluai taimi na faato‘ā auai ai i se faaipoipoga faa-Samoa. O loo faaaogā ai lava i nisi taimi i totonu o le tusi ni upu Samoa. E manaia foi mo le faitau a le fanau, aemaise e latou te a‘oa‘o ai foi uiga o na upu ma le faaleoga.
Ta‘ua i se pepa o faamatalaga mai le Papa Tales, o le faamoemoe o nei tusitusiga, ina ia mafai ona faamatalatala mai i fanauiti ma talavou i aso nei, a latou tu ma agaifanua na soifua mai ai o latou tupuaga ma latou uma foi, ina ia aua lava ne‘i galo ia i latou o latou faasinomaga ma a latou tu ma agaifanua.
E lē na o tala e uiga i le olaga o Samoa o loo tapena i ai le Papa Tales, e iai foi tusi o loo faamatala ai tala i aganuu ma mea sa tutupu i aso anamua i isi foi atunuu o le Pasefika.
O nei tusi e amata faamatala mai ai tala o mea sa tutupu i vaitaimi a o laiti foi o tatou mātua o mātua (grandparents) e pei o i tatou, ina ia malamalama lelei i ai fanau o aso nei, i ituaiga o olaga sa ola mai ai o tatou mātua a o laiti foi tatou.
E lē na o se tusi faitau, ae telē atu le aano o lenei tusi, e pei o se auala o loo tatala mai ina ia fiafia le fanauiti e faitau ma malamalama ia latou aganuu, ina ia ola a‘e ma se lagona e mitamita ma talisapaia tu ma agaifanua sa ola mai ai, o tala i mea na tutupu i aso anamua i o latou atunuu, ae faapea foi i isi aganuu.
O le faamoemoega o le Papa Tales, ina ia amata ona tupu a‘e se naunau fiafia o fanauiti uma e faitau ma ia fia malamalama ma talisapaia lo latou tofi tuufaasolo mai a latou tu ma aganuu.
O le tusi lona lua o le a agai i le faamatalaina o mea e manatua e se tamaitiiti mai le uluai taimi na iai i le faamanatuina o le tausaga fou (new year) i aganuu faa-Mosalemi i Fiti.
Papa Tales
O le Papa Tales o se kamupani e galue i lalo o le faalapotopotoga a le Lion Foundation Young Enterprise Scheme, mai le Kolisi a Aorere, i Papatoetoe. O loo latou tusia ma saunia tusi mo tamaiti o loo faamatala ai nisi o mea eseese sa latou tofo ma manatuaina mai aganuu a atunuu eseese.
O fanau aoga nei i le vasega Year 13 Business, o loo galulue i lenei poloketi, ua latou tuufaatasia le fiafia ia latou suesuega i mataupu tau pisinisi faapea foi le naunau ia malamalama ia latou lava tu ma aganuu.
E toatolu alo o Samoa i lenei kulupu – Sarah Foisaga Su’e, Tobias Su’a ma Matthaus Schreck – o isi sui o le kulupu – Diana Broederlow, Shama Bi ma Mehwish Nisha – o ni fanau Tonga ma Initia Fiti.
E lanu uma ata o le tusi ma o loo faatau mo le $20.00 i le tusi. O loo faatauina tusi i le Kolisi a Aorere, pe imeli i le Papa Tales: papatales@hotmail.co.nz