E lē toe tau faailoaina le tamaitai Samoa o Beatrice Faumuina.
O se tasi o alo o Samoa ua iloga i itu tau taaloga e pei ona ia tauavea ai le tagavai a Niu Sila i le tele o faagatama tetele a le lalolagi i le taaloga o le togi pulu mamafa, ae tainane le tele o isi foi taleni ua iloga ai Beatrice i Niu Sila nei.
Ae o le vaiaso atu i ona tua, ua faalauiloa mai ai le isi foi tofiga tāua ua faaeaina ai Faumuina, e pei ona tofia nei e le BEST Pacific Institute of Education (BEST), e faaulu ia te ia ni polokalame se lua tau a‘oa‘oga a le BEST, e nafa ma le aotauina o tomai tau ta‘ita‘i (leadership academy) ma le faalapotopotoga o galuega foai fesoasoani (charitable foundation) auā lava le a‘oa‘oina o tamafanau a le Pasefika e tulai mai na tofiga tāua i le lumanai.
I se saunoaga a Beatrice na ia ta‘ua ai, o le tofiga a le BEST mo ia, ua ogatusa lelei lava ma ana foi moemitiga, i lona naunau e fia vaai atu o tulai mai le toatele o ni tagata Pasefika i tofiga latou te taitaia pe taulamua ai i totonu o faalapotopotoga ma pisinisi i Niu Sila.
Na ia ta‘ua foi le manaomia ona tulai mai o tatou lava tagata, e faia faaiuga ma ni vaifofo lelei mo o tatou lava faafitauli. E moomia ona toleni ma a‘oa‘oina o tatou tagata Pasefika ia avea o ni taitai agavaa. Ma ua ia nofosauni e tuu atu atoa se tomai ua ia te ia, ina ia ausia nei moemitiga.
Faaalia e le Faatonu Aoao o le BEST, o Anita Finnigan lona fiafia ina ua talia e Beatrice nei tofiga tāua.
Saunoa Finnigan, ‘ua fetaui lelei nei tofiga ia Beatrice, auā i lona tomai o se tamaitai taalo, e malamalama lelei o ia i le agaga o le matuā finau ma le lē fiu gofie ina ia ausia se mea o fai ma taulaiga o taumafaiga.’
