O le au lakapi taitoafitu a le kalapu lakapi a le afioaga o Vaiala ua fai ma sui o Samoa e tali le valaaulia mai le iuni lakapi a Fiti ina ia auai atu se ‘au mai Samoa i le taamilosaga taitoafitu faavaomalo a lea atunuu tuaoi e faia i le faaiuga o le vaiaso nei.
O le au mai Vaiala ua faaigoaina o le Samoa Commercial Barbarians, na tuua le atunuu i le Aso Lua o le vaiaso na tea nei. Sa fuafua e malaga le au taitoafitu a le Manu Samoa peitai ona o loo feagai le au ma tapenaga o le taamilosaga fitu faavaomalo i Ueligitone i Niu Sila ma Los Angeles i Amerika i le masina fou, o le mafuaaga lea o le suia ai o le fuafuaga ma filifilia ai le kalapu lakapi a Vaiala e fai ma sui o le atunuu.
I se vaaiga i le atina‘e o lenei taaloga ua faailoa mai e le Iuni lakapi aoao a le atunuu le filifilia o ni alii talavou se to‘a 28 i avanoa sikolasipi o le a aooga ai i le nofoaga o loo faafailele ai le lakapi le HPU. O ia avanoa sikolasipi ua siitia le aofai o tamafanau a le atunuu ua latou maua mo lenei tausaga o faaleaoaoga.
