E ese foi le faalogona i le tele o le mau faafiafiaga faamavae mo galuega o le tausaga ua lata ona faaiu. Ua mae‘a le faamavaega a le tausaga muamua, lua ma le tolu o le matata o faiaoga faataitai mai le Politekinita a Whitireia i le vaiaso ua mavae atu.
O lea foi ua alo atu le ekalesia PIPC a le Christ the King mo le latou tafaoga i Waikanae i le Aso Toonai nei, faapea ma le alo atu foi a le lala o le FAGASA i Ueligitone mo le latou foi faamavaega i se taumafataga i se fale’aiga i le aai i Petone i le afiafi lava lea o le Aso Toonai, atoa ai ma le tele o faalapotopotoga ua amata ona faagasolo faamavaega mo le tausaga i lenei masina. O nai faafiafiaga lava mo le faaiuga o galuega o le tausaga.
E apoapoai atu ai lava la tatou Sooatulau ina ia faautagia le fanau laiti ma nei feoaiga i luga o auala aemaise o vai taele e taeele ai.
O aso lava nei e tele ai le fiafia ae galo ai le fanau. E lē gata foi i lena o le tele o le auavetaavale lē faaeteete i luga o auala i taimi pisi nei o le tausaga, ma e tele ai foi ma faalavelave faafuasei e tutupu mai ai ma lamatia ai le soifua.