Taimi fiafia o le seleselega

E ui lava ua tele ina mafatia lagona ma mafaufau o tagata Samoa uma i soo se vaipanoa o Niu Sila nei ona o tala faanoanoa i le faalavelave foi na taia ai si o tatou atunuu i Samoa i le vaiaso talu ai, ae o loo iai foi nisi o tala lelei e aumaia ai pea le lagona malosi ma le fiafia i lenei taimi.
E pei ona iai nisi o faauuga sa alo atu i ai le Iunivesite i Aukilani i le Aso Lua na sei mavae atu nei. Sa lotolotoi ai foi nisi o alo o Samoa i le anoano o papalagi ma isi atunuu eseese sa faauu ai lea sauniga i le Aotea Center i Aukilani. O se tasi o alo o lo tatou atunuu na aofia ai lena faauuga, o le tamaitai o Moana Ieremia, sa faauu mai ai ma lona faailoga o le Master of Laws with First Class Honours.
O Moana o se alo faasino i le Tofā Pa‘u Tooala Ieremia, mai afioaga o Samatau ma Faga i le Faasaleleaga, ma le tausi ia Ete Semanutafa Siaki Ieremia, mai afioaga o Apia ma Falealupo.
O Moana e lona lua i alo e toatolu o Pa‘u ma Ete, ma i se faatalanoaga a le sui o le Samoa Times ma le Tofā Pa‘u, na saunoa ai le tamā, pau lava se lagona ia laua ma le tina, o le fia faafetai i le Atua auā poo le a lava se taumafaiga a le fanau ae ana le seanoa le Atua, e le mafai ona taunuu mai lenei taunuuga fiafia. I le taimi e tasi, e la te fia faafetaia foi lo la alo, le tamaitai o Moana, ona o lea ua iu manuia ana taumafaiga e pei ona sa finau malosi ai i ana meaaoga.
Sa taua foi e le Tofā Pa‘u le fia faafetai i le susuga i le faafeagaiga o la latou Ekalesia PIC Newton, Susuga Maafala Koko ma le faletua ia Malū Koko, auā sa telē foi le sao aogā o le tausiga faaleagaga mai ia laua i le faaolaolaina o olaga faaleagaga o le fanau a le ekalesia, lea ua avea ma tapasā lelei e taulai i ai o latou olaga a o feagai ma le sailia o le poto salalau.
O Moana Ieremia ua tusa ma le 39 tausaga o lona soifua, ma sa amata lona soifuaga aoaoina mai le aoga tulagalua a Kelston Primary, sosoo lea ma le Kolisi a Avondale, seia oo atu ai lava i le Iunivesite a Aukilani e pei ona faauu mai ai. E le fou le faauu ia Moana, aua o le tausaga foi e 2006 na faauu muamua ai i isi ona faailoga o le BA & LLB i mataupu lava tau i le tulafono, ma ua maea foi ona talia aloaia i totonu o le sosaiete o loia i Niu Sila nei. Peitai o le soifuaga finafinau mo mea lelei aemaise pe afai o iai pea le naunau ma le malosi e fai ai, o lea sa toe saili atu ai Moana mo se isi foi faailoga maualuluga atu e pei ona iai lona ausiaina o le faailoga ua iai nei, le Master of Laws.