Taiala mo le saunia fesoasoani muamua i Falefaigaluega

O le Aso Tofi talu ai, na tatala aloaia ai se taiala fou ua saunia e le Matagaluega o Leipa, ma o lenei taiala e faasino tonu atu i pule o falefaigaluega, e fesoasoani ina ia tausisia vaega uma e ogatusa ma o latou tiute i lalo o le tulafono, ma tausia foi le tulaga saogalemu o tagata faigaluega i totonu o le falefaigaluega.
O lenei la taiala, le First Aid for Workplaces – A Good Practice Guide, sa tatalaina i se fonotaga na tuufaatasia ai le NZ Occupational Health Nurses Association ma le NZ Institute of Safety Management, ma sa usuia i Ueligitone i le vaiaso talu ai.
O lenei taiala ua iai ni pepa o faamatalaga e faigofie ona faaaoga e pule o galuega, mo le sauniunia o fesoasoani muamua poo first aids, ina ia faatulaga lelei ai vaega e sili ona lamatia i totonu o falefaigaluega taitasi.
Saunoa le Faufautua Sili a le Matagaluega mo mataupu tau le Soifua Maloloina ma le Saogalemu i Falefaigaluega, Dr Geraint Emrys, e eseese tulaga o falefaigaluega ma lamatiaga o iai, e fua i le ituaiga o galuega o faatino ai.
“O nei foi la lamatiaga e fuafua i ai ituaiga o fesoasoani muamua e manaomia ona iai, aua e ono tofu tulaga eseese e tulai ai, ma ituaiga eseese foi o first aid e moomia i ai.”
O nisi mea sa faaalia i le fonotaga e mautinoa lava le moomia ona tapena pe sauniuni ai ni first aids, o mea o loo aofia ai ni vailaau oona pe faaaoga ai ni masini, poo ituaiga o galuega ia e maualuluga ni vaega e oo i ai tagata faigaluega mo le faatinoina.
Sa talanoaina foi le tatau ona faamautinoa le aofai uma o tagata o loo galulue i totonu o le falefaigaluega i taimi uma, ma poo le ā foi le mamao ese o loo galulue ai nei tagata mai le itu o maua i ai se fesoasoani faafomai pe a tulai se faalavelave.
O loo aofia foi i lenei taiala (First Aid for Workplaces) se lisi (checklist) o mea uma e tatau i tagata ona mafaufau i ai a o filifili i le ituaiga o first aid na te moomia. E iai foi faamatalaga i mea o loo i totonu o pusa first aid, taiala i le taimi e moomia ai i latou e faatinoina nei fesoasoani muamua, ma auala e faailoa ai i le aufaigaluega poo a ituaiga o first aids o loo maua i totonu o o latou falefaigaluega.
Na saunoa foi Dr Emrys, e toatele tagata i tausaga uma e manunua pe oo ina mamai mai o latou falefaigaluega. Sa ia faatāua ai le moomia tele ona faatino se fesoasoani muamua i le taimi lava e tupu ai se faalavelave, aua e tele sona aoga i le mafai ona faasao mai ai se soifua na semanu e maumau, pe faaitiitia ai foi se manuaga na semanu e ogaoga.
Sa faailoa ai foi e iai ni tuutuuga faaletulafono e tatau ona utagia ma faatino e falefaigaluega uma, ina ia saunia mea uma mo le fesoasoani muamua, ia ogatasi ma le tulafono o le Health and Safety in Employment Regulations 1995, ma ia iai foi ni gaoioiga talafeagai e faatino pe a tulai mai se faalavelave faafuasei, ina ia tusa ma le tulafono o le Health and Safety in Employment Act 1992 (HSE Act).
O lenei taiala ua suia i ai le taiala lea na lomia muamua i le 2001.
Ua iai nisi o suiga fou tau le tulafono, e aofia ai le aveesea o le tulafono o le Factories and Commercial Premises (First Aid) Regulations 1985.
O lenei taiala sa galulue soosoo tauau i ai i latou ua iai tomai iloga i galuega tau falegaosimea, ma ua saunia ina ia iai i se tulaga e lelei le faatinoga o nei galuega.