E toafā ni alii o loo aafia i le gaoiga o le $298,000 mai le Mataluega o Leoleo ma Falepuipui i le vaitaimi o Ianuari 2006 e oo ia Ianuari o le tausaga e 2008.
I le toafā lea e aofia ai le alii o Taylor Miti sa tetee malosi i moliaga o le gaoi a o avea ma tagata faigaluega, o le faia o faiga tau faasese i faamaumauga o tupe, ma le faamalosi ona tala ni siakitupe.
Na i‘u ina sui lana tetee i le ioe ma faia ai loa le faaiuga a le Faamasinoga Maualuga.
I le folasaga a leoleo na faaalia ai o ni alii e toalua sa faigaluega i le Matagaluega o Tupe a le Malo sa la saunia siaki pe a oo ina avatu e Taylor Miti pepa o invoice mai kamupani e totogi ai oloa e tala mai ai e le Matagaluega o Leoleo ma Falepuipui mo a latou galuega.
O le tiute foi lea a Taylor o le totogiina atu o pili a le matagaluega i ia kamupani ma pisinisi.
E iai ma se isi alii sa galue foi i le vaega o tupe a le Matagaluega o Leoleo ma Falepuipui o loo molia ai i lea lava gaoiga ma o loo ia teena le moliaga faatasi ma alii sa galulue i le Matagaluega o Tupe a le Malo lea e suesueina i le masina fou o latou moliaga.
O nisi invoice mo le tapaina o siakitupe mai le Matagaluega o Tupe sa totogi agai i se kamupani e ta‘ua o le AG store, peitai e leiloa poo ai lea pisinisi.
O se teugatupe sa faia i lalo o le igoa o lea pisinisi na teu i ai nisi o siakitupe lea na ta‘ua e leoleo i le latou folasaga i moliaga o Taylor Miti e iai taimi e na te toe tala ai i tua ni seleni mai lea teugatupe ona tufatufa lea i alii nei e toafā.
Faaalia e le afioga i le faamasino sinia o Vui Clarence Nelson, o le gaioiga na faia e Taylor ua ia talepe ma lepeti ai le faatuatuaga o le matagaluega sa tuu atu ia te ia e faia ai le galuega, aemaise o ia o se alii ofisa sinia i le vaega o tupe.
Sa na o le punou o le alii a o tolaulau le faaiuga a le faamasinoga lea sa faaalia ai ni itu lelei faasaga ia Taylor e pei o lona toe ioeina o moliaga e ui ina sa tetee muamua, ma le faato‘ā molia lava lea i se solitulafono ae ua 40 tausaga o lona soifua.
O se tautinoga mai lana Ekalesia a Iesu Keriso o le Au Paia o Aso e Gata Ai poo le Ekalesia Mamona, na ta‘ua ai o se tagata e toaga i le lotu ma tausaafia ae leiloa pe aisea ua faaseseina ai.
