O Motoi Vesi o se taulealea o Aleisa ua 34 tausaga lona matua ma o ia foi e mai le nuu o Savaia Lefaga. E toalua ni taulelea talavou na ia faia i ai se faaoogalima matuia na faaaogā ai se agaese (sapelu) e mafua mai i se taaloga piliati.
Fai mai leoleo ia latou faamaumauga sa folasia i luma o le faamasinoga o le aso 28 o Me o le tausaga e 2013, na faia ai se taaloga piliati a Atonio Toma ma le alii o Faith Toma o se auso i se fale piliati i le nuu o Saleimoa uta. Sa taaalo ai ma nisi o a la uo e faapea o tupulaga lava o lea nuu.
O le po o le aso lea a o faia le piliati a Atonio ma Faith ma a la uo ae tifa atu loa lē ua molia le alii o Motoi Vesi ma e faapea na alu atu ma se agaese. Sa alu le taaloga ma sa taalo ai foi ma lē ua molia, ae ina ua tapuni le fale piliati na oso ai loa ma le ita o lē ua molia, lea na faufau ee ai ma ususu ma lafo ni upu masoā. Sa ave i fafo o le fale piliati e Atonio ma Faith ma tau faafilemu ma fai i ai e tuu i lalo lona siufofoga ma tuu lona laulau vavale.
Na avea lea tulaga ma avanoa na oso tele ai le lē fiafia o lē ua molia ma ia faalala ai loa ma lana sapelu. Na oso le alii o Atonio ua uu ana maa ona e vaai atu o le agaese ua la faafeasagai. Sa ia valaau atu i lē ua molia e aveese lana aupega ona aveese lea o ana maa ae la fusu. Peitai ina ua mamulu ese maa a Atonio na lalaa atu ai ma Motoi ma sasau atu le aupega lea na tali mai e Atonio i ona lima ma aafia ai loa i ni manu‘a.
O le tauiviga lenei na iu ina palasi ai Atonio ua lē mafai ona toe tali atu, ae oso ane ai loa ma lona uso o Faith ina ua vaai atu ua lavea lona uso matua. Na liliu atu foi i ai lē ua molia ma le aupega. O le vevesi na tupu na iu i le falemai na ave i ai le auso ua manunu‘a ae logo leoleo ma ave ai loa lē ua molia ma taofia ae faatino suesuega.
O aafiaga o le auso na faaalia ua lagona pea e Atonio le tiga o ona lima ae ua sili ona tiga ma oso lona ita pe a toe mafaufau i le gaioiga na faia ia te ia e lē ua molia. O lona uso le alii o Faith ua faaletonu lona fofoga ua tau lē lelei le lamuina o ana meaai, ma ua iai foi se ma‘ila i ona foliga.
Sa molia Motoi e leoleo i lona taumafai e faaoo le oti i a Atonio 30 tausaga ma Faith e 18 tausaga. O le faamaonia o le solitulafono na amata ai le fua a le faamasinoga i le 12 tausaga, peitai na toesea le isi lua tausaga ona o ni itu lelei mo lē ua molia. Ua totoe ai le sefulu tausaga ua nofosala ai i le falepuipui.
O masina sa nofo taofia ai e faatali suesuega a leoleo ma le faamasinoga o le a toesea mai lea aofaiga o tausaga.
