“Ua ou faamagalo ia Fineaso,…”
E pei o se maliu na fai i le fale sa iai Viliamu Faaleleiga i le taimi na tolaulau mai ai le iuga o le alii leoleo na tagi lenei alii i le sauāina o ia. O le tolu ma le ‘afa tausaga ua ta‘u i ai ina ua mae‘a mai ona lau le iuga i le Fale Faamasino i Mulinuu.
Na ona lūlū lava o le ulu amata loa ona tagi ma na i‘u ina tau lē mafai ona taofiofia le leo o le tagi o le alii lenei. O le mafai ona tuutuu ifo i lalo o lona leo ma le masūsū ua amata nei, na faato‘ā mafai ai loa ona faatino se faatalatalanoaga.
“Aisea ua e tagi ai o lea ua aumai le tali. E lē o le tali lea na e manao ai?” o le fesili muamua lea ua fai atu.
“O lea ou te fiafia, ae ua fa tausaga o tau toso mai lenei mataupu, ma e pei ua matuu atu se avega mamafa ua fia tausaga o ota tauave, lea la ua aumai le tali, ua ou matuā leiloa lava poo le ā tonu le lagona e tatau ona ou maua, pe fiafia, pe ita pe faanoanoa foi,” o se faaaliga lea a lea alii.
Na fai lava le faatalatalanoaga o tau tapa Viliamu i lona aiga ona o se mataupu lenei e oo lava i le Faamasinoga ua matuā lē lelei ai le va o lea alii talavou ma lona aiga.
“Ua leva ona mananao le matou aiga e ave i tua le mataupu ae o loo o‘u finau lava ona o le solitulafono ua fai ma e tatau ia te au ona aveese so‘u fefe ae faatino le mea e tatau ona fai.
E lei iai lava se isi na manatu e mafai foi e a‘u pe faafafine pe leai ona iai ni lagona tiga ma le tutui ona o le tulaga na iai lenei mataupu,” o le masusu lea a lenei alii.
E 18 tausaga o Vili ae tulai mai loa le faafitauli lenei a o taofia ai i le Olomanu, le nofoaga mo tupulaga talavou ua aafia i le tulafono.
O moliaga o le gaoi na taofia ai Vili ma na ia ta‘ua sa lagona lona fiafia ina ua maua tala o ia e aiga i le taitai leoleo o Fineaso Aimaasu lea ua loka nei i le tolu ma le ‘afa tausaga ona o le faia o uiga matagā faasaga i lenei alii.
“Ona pau lava lo‘u tagi ona o lo‘u aiga, maimau pe ana mafai ona ou foi i lo‘u aiga i le mae‘a ai o lenei mataupu”.
Na mulimuli ane toe faaalia e Viliamu, ua mae‘a ona feiloai ma lona aiga ma ua toe faaleleia lo latou va ua alia‘e ai feeseeseaiga ona o lenei lava mataupu.
“Ua ou faamagalo ia Fineaso, ma ua ou manao foi e faatea atu lenei faafitauli, ona pau lava lea o le mea na ou manao ai ia manino le tulafono aemaise ia iai se ‘ai o lenei mafatia”.
Na matuā tumutumu aiga ma uo aemaise o le afioaga o Magiagi i le aso na tolaulau ai le iuga o le alii taitai leoleo. Na tumau lava le tetee o le alii leoleo i lenei mataupu seia oo lava i le iuga o le Faamasinoga.
Ta‘ua e le alii Faamasino le afioga Alo Vaemoa Vaai, o lenei faasalaga ua faia o se lapataiga mo soo se leoleo a o soo se isi foi e i tofiga maualuluga o le Malo ma Kamupani eseese i totonu o le atunuu, ina ia tuu ai le solitulafono.
Faaalia e le afioga Alo, e le ‘alo lava le tulafono i le tali atu i soo se tasi e pei o le taitai leoleo lea, pe a faamaonia le solitulafono.
O le ave o le faamoemoega atoa o lē ua aafia i le taitai leoleo auā o ia sa vaaia Olomanu, ma le itu lea o se leoleo lenei alii e tatau ona tausi le tulafono, ua talafeauga ai lava le ave o le faasalaga faafalepuipui.
Mo Vili o lea ua mae‘a lenei mataupu ma ua taumafai foi e aveese mālie ma lona mafaufau.
