“Ua ou fiu e fai i le ulugalii o a‘u ua toe fia sau i Samoa ae mumusu. Na taunuu loa le vaafaila i Filipaina o‘u sola ese loa”
O le tamaitai o Melisa e mai le nuu o Fagafau i Savaii, ae na sau i Upolu ma nofo ai i se tasi o ona aunty i Palisi ma sue ai sana galuega ona o le fia fesoasoani i ona mātua ma lona aiga i Savaii.
E valu tausaga o alu ese Melissa ma lona aiga ina ua fetaui se tasi o lona aiga i Palisi ma se ulugalii papalagi sa afea Samoa i lo la vaafaila, ma fai mai o loo tau saili ni tagata e mafai ona latou malaga e faigaluega i luga o le la vaa.
O Melisa na ia maua le avanoa lea ina ua malie o le a alu i le vaafaila. E lua aso na faia ai lona Tusifolau ae mae‘a, ona malaga ese ai lea o le ulugalii faatasi ai ma le tamaitai o Melisa.
“Sa fai mai e aua ou te popole a taunuu i Amerika le matou malaga o le a fesoasoani ia te au”. Na alu le malaga ma afea ai Fiti peitai na faaalia e Melisa e leai sona totogi na maua.
O le tausaga e 2001 na alu ese ai ma Samoa le tamaitai, ma o lona tuua o le atunuu sa tuu fesilisili ai pea lona aiga i ona mātua, poo fea se mea ua oo i ai lana faigamalaga, ona talu lava ona alu ese ma Samoa e lei maua mai se tala, poo se tupe foi o lana galuega i luga o le vaafaila.
O le tausaga e 2009 na toe malaga mai ai i Samoa le tamaitai, ina ua mae‘a ni sailiga sa fesoasoani i ai se alii Ausetalia e suafa ia Bruce Peak ma lona toalua o se tamaitai Samoa, e faifeau lona uso ma lona toalua i se ekalesia AOG i Fagafau i Savaii.
O le aulotu lea e lolotu ai le aiga o Melisa lea na latou faamatala i le faifeau ma lona faletua le fia maua o se fesoasoani e saili ai se mea o iai Melisa.
O sailiga a Bruce ma lona toalua sa mafai ona fesoasoani i ai le Ofisa o le Amepasa o le Malo o Niu Sila i Filipaina.
“Sa ou fai i le ulugalii o a‘u ua toe fia foi i Samoa i lo matou aiga, ae sa mumusu fai mai e faaauau pea le matou folauga”. Na taunuu le vaa i Filipaina o inā na ou sola ese ai loa”.
O le faamatalaga lea a Melisa i se feiloaiga ma tusitala. “Na ou sola o‘u nofo i se aiga i Filipaina ma sa maua ai nai galuega e pei o le fufuluina o se fale ae maua ai si tupe ou te ola ai”.
Na ma fetaui ai loa ma se alii Filipaina lea na maua ai si a‘u tama o Angelina”.
Sa tau lē mafai ona faamatala le mea atoa na tupu e Melisa ona o le mafatia o lona loto pe a toe mafaufau i tua i le taimi a o iai i nuu ese, ona o le faigata o le fia foi i le aiga ae ua lē iloa pe faapefea ona saili se fesootaiga.”
Sa ou taumafai e sue se telefoni e maua ai lo‘u aiga ae sa lē manuia, ae sa iai se faifeau tala‘i Mamona o se alii Samoa i le nuu o Samata sa faamisiona ai i le vaega o Filipaina sa ou nofo ai, o ia lena na maua ai se fesoasoani na mafai ona fesootai mai ai i lo matou aiga”.
Sa faia loa pepa ma taumafai e toe faafoi mai Melisa i Samoa, peitai sa mafai ona maua le fesoasoani na maua ai lona Tusifolau, ae o si ana tama teine o Angelina na fanau i Filipaina e leai se pepa fanau e faia ai se tusifolau.
Na fesootai mai le alii o Bruce ma lona toalua i le pule sili lagolago o le Matagaluega o Femalagaiga a le Malo le susuga Faafouina Milford, ma mafai ai ona maua le auala e aumai ai le tama teine a Melisa lea na faaaogā ai le tusifolau o lona tina la te malaga faatasi mai ai.
Faaalia e Bruce e lē faigofie sailiga na faia i le fia maua o Melisa aemaise o feuiuiaiga sa taumafai e saili ai poo fea tonu o Filipaina o loo nofo ai. Ina ua mae‘a le tusifoalu ma tapena mea uma mo pasese o vaalele, na faapea ona tuua ai loa e Melisa ma lana tama Filipaina ma foi mai i Samoa.
“Ou te faafetai ia i latou na auai i galuega e sailia ai so‘u fesoasoani, aemaise Bruce ma lona toalua, faapea le sui o le Malo o Niu Sila i Filipaina ma lona toalua”.
O le lapataiga ua aumai e Melisa i alo teine talavou faapea le tupulaga lalovaoa o Samoa, ia aua ne‘i soona oso e pei o lana faigamalaga e fia maua se galuega e tausi ai ona mātua ma lona aiga, auā e leiloa mea e tutupu mai ai.
O loo sailia pea e le vaega o le FBI a Amerika le ulugalii na latou malaga ma Melisa i le vaafaila mo le faia o se suesuega i le mea tonu na tupu, ma le galuega na ofo mo le tamaitai ae e lei maua sona totogi.
Fai mai Melisa sa ia faia galuega o le fesoasoani i feau i luga o le vaa e pei o le sisiina o la, ma le kukaina o meaai. Ae e iai nisi o taimi e pei ona ia faamatala sa taumafai atu ai le tamaloa e faasufi o ia mo se faigaaiga.
“Sa ou malosi lava e tetee uiga na faaali mai o le tamaloa”.
E tele isi mea na tutupu ua lē mafai e le tamaitai ona faamatala ona o le mafatia tele o lona mafaufau, ae o le mea sili ma tāua ua toe foi mai i Samoa ma mafuta ma lona aiga.
Na alu ese ma Samoa ua 19 tausaga, ae toe foi mai i le lua tausaga ua mavae ua latalata i le 30 tausaga o lona soifua.
