I lalo o le tulafono e iai le aiā tatau a oe o le tagata e leaga le faalogo e te talosagaina ai le fale faamasino a o e lei tu i luma o se faamasino e te fia mauaina se fesoasoani, ona o oe e leaga lau faalogo. Afai e lelei lau faaaogāina o se isi e faaaogā le sign language, o oe e te logoina le fale faamasino a o lei faia lau faamasinoga e te fia maua se fesoasoani ona e lē lelei lau faalogo.
Afai e iai sau loia, ta‘u i le loia e na te logoina le fale faamasino a o lei faia le faamasinoga.
O isi tagata tutuli e lē iloa faaaogā sign language ae mafai ona iloa upu la e tautala mai ai le faamasino pe a fai i le faamasino e faamolemole e tilotilo mai ia te oe ma tautala faagesegese (lip read).
Afai e lē lelei lau Igilisi, fai i se faamatalaupu Samoa e fai i le faamasino o oe e lē lelei lau faalogo, e te manaomia se fesoasoani e faamatala atu ia te oe ma faasaga atu le tagata faamatalaupu ia te oe, ia e malamalama i upu la e fai atu , a o e lei tali.
O le vaiaso nei na ou faia ai se faamasinoga a se papalagi matua e tutuli, i le matupu tau Insurance. Sa ou taumafai e Apili faaiuga sa fai e se Tribunal ua aafia ai lenei tamā, ona sa lē faalogo le Referee o le Tribunal i le augani atu a lenei tamā e na te fia maua se fesoasoani ona o ia e lē lagona se tala e fai mai. Na iu ina fai se faaiuga e lei iloa e lenei tamā tala a le Referee ma le tama na tuua‘ia lenei tama e tutuli.
E tele tupe e alu ma le taimi e taumafai ai mea faapenei ae sili lava le taumafai i le amataga e faasa‘o le auala e faaaogā mo le tagata tutuli.
O loo iai foi se alo o Samoa i totonu o le falepuipui e lē o mauaina e ia se fesoasoani ona e tutuli, ma e lē lelei lana Igilisi. O loo o‘u taumafai e fesoasoani i ai ona ua leva na tatau ona tatala mai lea tama i tua, ae e lē o aveina i ai e le falepuipui se fesoasoani ina ia ona lagona ai upu la e fai mai i luma o le Parole.
I lalo o le Human Rights Act a Niu Sila e tele vaega e puipui ai aiā tatau a tagata tutuli. Ia tautuana mo outou uma o aiga, ia lava se fesoasoani i o tatou tagata e lē lelei le faalogo.
Tatou Tiute mo tatou Tagata Matutua i Falemai
O le vaiaso nei sa ou asiina ai se tina ua 88 tausaga o i le falemai, o loo tigaina. Sa alu atu le teine fomai o le sui o le sifi, ta‘u ane le igoa o le loomatua, ae lē o le igoa lea o le loomatua. E ese le igoa la e i luga o le laupapa i le ulu o le moega.
E foliga mai e le afaina tele le mea o faaletonu, ae pagā lea e alu atu le teine fomai lea na sui atu ma le faila o le a fai togafiti i le loomatua, o le faila e ese le tagata e ona.
Sa ou talanoa i le teine fomai e alu e aumai le faila sa‘o a le loomatua ne‘i tui sese, pe ave ni vailaau e lē tatau ona ave i le loomatua.
E puipui aiā tatau a tagata matutua i le tulafono.
O le tiute o tatou uma, ia mataala ma taofi mea sese a o lei oo i ni tulaga faaletonu. Ana tui sese lenei tina matua ona o le faaaogāina o le faila a le isi tagata, atonu e telē se afaina o lenei tina.
Mataala i taimi uma, aemaise o tatou tiute i tagata matutua ma tagata mama‘i.
