E ui lava ina ua agiga ile ea faasalalauga faalauaitele a alii ma faipule o Lufilufi, i ala ata ole televise, e tapu ai ma soloia ai le aufuefue suli o Vaomalu ma suli o Taloafulu mai le osiganuu a alii mai faipule o Lufilufi, ae peitai e oo mai ile taimi ole lipoti e le o lagona se tali atu.
O lenei faasilasilaga sa faasalalauina i luga ole polokalame, a le TV EFKS ile amataga ole vaiaso ua tuanai. Ole ute ma le sini o lenei tapu ona ua sosopo ile lagi, ma oia faavae o Lufilufi, talu ē na tutupu mai poo matai ole aiga o Taloafulu.
A soli le tapu e mu le foaga. Oloo fesiligia le faasalalauga, le finauga faavae a suli o Taloafulu, oi latou e lufilufia ma faasoaina taumafa a Lufilufi. Ua oo lava i tulaga ma‘ale‘ale, ole nonofo ai o Tumua ma le Tui Atua, ua asiasi iai finagalo o Suli o Vaomalu.
Na talanoa mai le sui ole afioaga, ae ua mae‘a ona faia se tapu ale nuu e faasā ai ona tali i soo se fesili e laga pe fesiligia e sui ole au Tusitala. Ole pogai lea ua le mafai ai ona faalauaiteleina matai sinia e toalua ole saofaiga ole toaono lea na maua faatalanoaga ma le sui ole tatou nusipepa, ona o manumanuga, nei Ulu le tafe ae selefutia ai Vaisigano.
Sa fesiligia foi se finagalo ole tootoo e faasino ile mau ale atunuu, e leai se nuu e po pea. Ole tali e le faapena Lufilufi, afai e faasilitofo se tasi ile iuga ua faia, e iai tua o pata tua. Ua mautala le saofaiga ua ave le mataupu lea ile faamasinoga. E saili fofo ai ē ua aafia ma a latou aiātatau i lenei aulape.
O faaiuga a osi ga nuu, ose tasi lea o mataupu ma‘ale‘ale, oloo tulai mai ai pea finauga. E le gata ile va o aiga ma matai o nuu, aemaise foi le loaloa ole saofaiga. E ui ina o Samoa ole atunuu ua mae‘a ona tuulaupua ma tuumatāmaga ona faavae popo, ae o aso nei, ua faatāua pea le aiātatau. Ole aiātatau lea e avanoa ai soo se tasi, na te faaulu se talosaga ile faamasinoga o Fanua ma Suafa e oo lava ile faamasinoga Maualuga.
E lei maua se avanoa e talanoa ai ile pule ole Faamasinoga e tusa ai ma tulaga aloaia e faamautu mai ai, le aso ua faatulaga iai le mataupu lenei, ae pe ua iai foi ni talosaga. Ile va o suli o Taloafulu ma suli o Vaomalu, faasaga i alii ma faipule o Lufilufi.
E ui lava ona o Lufilufi ole Tumua ae ole a lē avea lea ma auala e tuusaunoaina ai, mai le molia ile faamasinoga pe afai e iai ni mafuaaga talafeagai. Pei lava foi ona silafia ele mamalu ole atunuu, sa iai foi le tulaga faapea na lagomia ai tausiga a Lufilufi ile va feagai ma le afioga ale Tui Atua.
Na faatea ai ele toaono ma le saofaiga Tui Atua mai le faiganuu. Na asiasi le finagalo o Lufilufi ile toe aveesea o pāpā ina ua mae‘a ona latou e‘e ile afioga ile Tui Atua. E le gata i lea ole tele o sasi ma lape ile nonofo ai o aiga ma nuu, e talitonu suli o Taloafulu, ole mataupu lava lea oloo aafia i latou, e le gata ose mataupu ma‘ale‘ale, ae ole tulaga i faiga faakegi. Afai e lei faaa‘ea e Lufilufi le Tui Atua, o lona uiga e talitonu le toatele, e le toe a‘e e faavavau suli e pei ona ta‘ua. Tainane e le finau le soifua ma le faavavau ale Atua.
E mavae tupulaga ma agai mai le talutalu fou, ae ole a solisoli mulivae lava i faiga nei ma taiala ua lē maua ai se fealofani. Ole talitonga lea ose tasi mai le foaiala ole Tumua lea na maua atu ile telefoni, o faia se malologa ile fonotele i Malua, o ia foi lea sa ia faailoa mai, e le faavaea le mau ale fuainumera laititi, lea ua latou faia se faaiuga, ma ua ta‘u atoa ai Lufilufi ma le saofaiga. O alii ma faipule o Lufilufi.
Ole ā se molimau ale faavae, tulafono ma taiala na fausia ele malo, e puipuimalu ai aiātatau pe afai e satia. E manino le tusilima ale faavae o Samoa ole atunuu Kerisiano, ma e faavae i ana tu ma aganuu. E le gata i lea, e faavae ile Atua. Ole faavae lea oloo faapea mai e tutusa tagata uma ile puipuiga ale tulafono.
Aua a lē malu lau aiātatau, ua aafia foi le faavae, lea oloo faapea mai, e avanoa soo se tasi, i fefaaaliaiga o taofi ma le saolotoga e faailoa ai manatu. The freedom of expression. Ole saoloto lenei na mafua ai ona faaleo se lagona o suli o Taloafulu ma suli o Vaomalu na afua ai ona lagalagā ma toatamai ai le Tumua.
Afai ole tali e maua mai ile faamasinoga, pe mafai e se faaiuga ona toe faafoi filemu suli ua aafia i o latou eleele ma fanua. Ua faapea mai aulape ole tootoo, afai tou te faasilitofo, ile susuga pau, e ono mu le foaga, ma aafia ai tagata.
E ono le gata ia i latou ua aafia (victims) ae o ē faatinoa aulape ole toatamai. Auā e le ‘alo foi le faamasinoga ma leoleo mai le faatinoga ole latou pitolaau, pe afai e solia se vaega o lea tulafono.
Talosia ia aveave se finagalo, e tau mai lelei ma maua se toafilemu, i finagalo ma loto ole Tumua. Auā foi o Lufilufi e ao iai amio. E le gata ole tu ma le aga, ae ole amio.
