O Novema o le tausaga e 2008 na faaoolima ai ni alii se toalima o le nuu o Letogo i se alii talavou 18 tausaga le matua o le nuu tuaoi o Vailele ma maliu ai lava.
E ogaoga manu‘a i le ulu ma foliga o lē na maliu ma avanoa ai ona sao atu le palapala (toto) i lona faiai e pei ona faaalia i le lipoti a le fomai na faia le taotoga e sailia ai le mafuaaga o le maliu.
O se faaoolima sili ona matuiā i le silasila a le faamasinoga, ona sa faaaogā ai ni maa ma ni atigi fagu, toe tatu‘i ma fekiki e i latou na molia.
O le po o le aso 14 o Novema o le 2008 na alu ane ai le savaliga a ni alii se toafā mai le nuu o Letogo ma taunuu ai i Vailele i le taimi ua ili le pu o le vavao a lea afioaga i le tusa o le 10 i le po.
Na fesiligia i latou e nisi o le au leoleo sa poo fea a alu i ai le latou solo, ae o le tali e fia o e faatau i le faleoloa o loo iai le pamu i Vailele.
Faaalia i tolaulauga a le faamasinoga e lei afea e i latou le faleoloa lea, ae faaauau i le vaega sa faia ai se taaloga Bingo, lea na tuliususū ai le tasi o taulealea ma laulauvavale.
Na liliu le savaliga ma toe foi i Letogo ma tau atu ai i ni alii talavou o loo eva mai i le magatolu e faapea o le tuaoi lea o Letogo ma Vailele.
O le nofoaga lea na faaoolima ai i latou i lē na maliu.
E lē o iloa le mafuaaga o lea gaioiga ae na faaalia e le faamasino sinia o le Faamasinoga Maualuga, le Afioga Lesatele Rapi Vaai i lana faaiuga, o se gaioiga matuiā tele na faia e i latou.
O le faaoolima lea na auai ma le isi o alii talavou o le nuu o Letogo lea e faapea e lei tele sona sao i le faiga o le solitulafono ona e na o le nofoaga lea na iai, ae e lei alu i le savaliga a le isi toafā lea o loo iai le talitonuga o le faamasinoga na faia ai se taupulepulega e faatino le solitulafono.
O le alii e toatasi e toalima ai i latou na molia, ua nofo vaavaaia mo le lua tausaga ma ua poloaina e le faamasinoga ina ia auai i polokalame a le ofisa faanofo vaavaaia.
O ia lea o loo a‘oga i le Kolisi o Samoa i le taimi nei.
O le isi alii talavou o loo a‘oga foi ua aofia i le toafā ua falepuipui mo le umi e fā ma le ‘afa tausaga.
O i latou uma lava sa aooga i le taimi na tupu ai le solitulafono, peitai toe toalua o loo aooga pea ona ua mae‘a aoaoga a le isi toatolu.
O le toatolu foi o nei alii talavou e lei toe faatagaina ona toe nonofo i totonu o Letogo pe i se isi faaupuga na faatea ma tutuli ese ma le nuu.
E faagasolo o latou faamasinoga o loo nonofo i latou i se tasi o faifeau o le Ekalesia Katoliko i Leauvaa.
O loo tapu e le faamasinoga ona faasalalau suafa o ia alii talavou ona o le laiti o tausaga e i le va o le 15 ma le 18 le matutua.
