Taatele pea le gasegase o le Fiva Rumatika i Samoa

E leai lava se a‘oga e lē oo atu i ai le Matagaluega o le Soifua Maloloina e suesue i gasegase o le fatu, e sao mai i tamaiti aafia.
Talu ona amata le galuega lenei o le saili o tama ma teine a‘oga i Samoa e ma‘i fatu ua silia i le to‘a 300 ua maua i ia siaki, ua aafia.
Ua silia i le to‘a 10,000 fanau ua mae‘a ona fai siaki – o le toatele e faafetaia e le Matagaluega e siaki atu o loo mafai ona fai i ai togafitiga. O le isi vaega ua maua atu ua tatau ona fai taotoga ma o Niu Sila lava e agai i ai fanau nei ua aafia fatu ona o lenei gasegase.
O le faaiuga la o le vaiaso na tea nei na oo ai lenei polokalame faagasolo i le Aoga o Matata Eseese a le Ekalesia Katoliko i Alafua le Don Bosco.
O le faamatalaga a le faauluuluga o lenei polokalame, le alii fomai, Polofesa Dr. Satupaitea Viali, o le aso muamua lava o le latou suesuega i Don Bosco, na maua ai e toaono tama ua aafia o latou fatu ae aofia ai le toatasi ua matuā afaina lava ma o le a sauni e avatu i Niu Sila i se taimi vave e faia ai ona taotoga.
E lei iai lava se a‘oga ua sao mai ma o le faamatalaga a le alii fomai, e faigata tele lenei gasegase ona e leai ni auga ua faamautu mai ma o le toatele lava o le fanau seiloga e avatu i nisi gasegase ua masalomia le maua ai, faatoa manino ai ua maua i le Fiva Rumatika.
O le tiga o le faai, o le tiga o sooga o ponaivi, o isi lava ia auga e fesootai ma le gasegase lenei ma o le fautuaga ua toe avatu i le atunuu e mātau lelei lava ia auga ne‘i tulai mai ma e tatau ona talosaga pe mafai ona siaki ai le fatu o soo se tamaititi e maua i ia tulaga.
O le siama na ta‘ua e le alii fomai e mafua ai lenei gasegase e mafai ona pepesi atu i le tale o le isi tamaititi aoga e maua ai ma pepesi atu ai i isi tamaiti.
O le siama la lea ua mafua ai le gasegase ma e faigata tele ona mateia ua maua ai le tama ma le teine aoga seiloga lava ua vaai le fomai.
O le faigata o le Fiva Rumatika ona e aafia ai lava le fatu ma e i‘u lava ina maliu ai le tamaititi ma le teine aoga pe a lē togafitia.
E maua loa ua aafia ae e lē o tigaina. Ta‘ua e Dr Viali, e tatau loa ona iai fualaau e inu ma tui e fai i masina uma ina ia mautinoa e alu ese le siama.
Mo fanau ia e manaomia taotoga e $70,000 tala Niu Sila le tau o le taotoga ma o se tulaga faigata tele pe afai e faatuputupulaia pea lenei gasegase ona o le tau o le a feagai ma le malo i lea tausaga ma lea tausaga mo le avatu ai o fanau e togafitia i le aafia ai o o latou fatu.
O le fautuaga ua faaopoopo mai ia mamā nofoaga e ola ai fanau, mamā taumafa, mamā le siosiomaga i fafo ina ia mautinoa e lē maua ai le siama lenei e agai i le fanau ma faapea ona aafia ai. O le suavai ia faapupuna ma ia mautinoa lava e saogalemu le fanau auā o le fanau lava lea e foliga mai e telē le aafiaga i le Fiva Rumatika.