E manatua pea Tunumafono Pito Faalogo
O le anavatau ma le faamoemoe maualuga sa fau ao fau po, a o se aoaoga sa totō i fatu ma loto o le autalavou i le tele o tausaga, ma ua manaomia nei ona fai se tino ma faagaioi loa mo lenei vaitaimi.
O le fatu na lulu e le Taitai autalavou, le afioga ia Tunumafono Pito Faalogo na ia lui ai tama ma teine, ina ia faaaogā lo latou taimi, ma lo latou malosi e fesoasoani ai mo latou aiga ma mātua, o le ekalesia foi lea, auā le fausia o so latou Malumalu e tapuai ai i le Atua.
Sa faamaonia mai e le auauna a le Atua, le susuga i le Faafeagaiga ia Rev Vaaelua Patu e faapea, O se luitau lelei ma le tāua sa saunoa i ai le Taitai, a o lei tatala e le maliu le mafutaga i ni nai vaiaso ua tuanai.
E ui ina ua tetea ona ua fai i lagi lana folauga, peitai o ana saunoaga ma timaiga mo le autalavou, atoa ai ma ana galuega lelei ma le tāua sa faatino, o le a manatua pea e lē galo.
O se tasi lea o ana luitau tele sa fai i lana autalavou e faapea, Ia outou toaaga e galulue i galuega uma mo le fausia o le Falesa, auā o le galuega mo outou. O le lumanai o le ekalesia o outou lava, o le Malumalu foi ma meatotino o le galuega, o a outou ia.
O le a outou matutua a‘e, ae fai atu o tatou mātua matutua, ma o le a avea outou ma molimau ola ma vaai pea lava pea ia outou galuega sa fai.
O le tagapolo e pei ona saunia nei i ai, o se poloketi foi na fuafua e Tunumafono ma lana autalavou, mo le faamoemoe e pei ona ta‘ua.
O le ala foi lea ua lē solomuli ai le autalavou mai le faataunuuina o lea faamoemoe, ona talu ai, ua toesea lē sa fuafua ma faataoto le fuafuaga. Ae o le a alo tama ma teine e faataunuu ana polokalame sa fuafuaina.
Saunoa le susuga i le faafeagaiga ia Rev Vaaelua Patu e faapea, e ui o se taaloga, peitai o le a ese foi se isi lagona o le a faavae ai lea aso.
E lē gata o le a faia i le agaga o le taalo, ae o le a sili ai ona faia o se aso faamanatu mo le susuga ia Pito Faalogo, e manatua ai ana galuega lelei, ma le fatu sa ia lulu i loto o le autalavou.
Mafuaaga o le taaloga
E leai se isi mafuaaga e sili atu nai lo le vaega tāua e pei ona ta‘ua muamua. O le galuega e ala i le Malumalu tapuai mo le Atua, o le faamoemoe autū lea o loo ogatotonu i ai sailiga matagi ma tapenaga a le aulotu. O le vaega ma le pito laau a le autalavou mo so latou sao i le fausia o le Malumalu, la lea ua faataoto ai le taaloga tapolo.
O seleni uma ma tupe o le a maua i le taamilosaga e pei ona fuafuaina, e tasi lava le auga ma le sini o le tuu i totonu o teugatupe a le ekalesia, auā le galuega tele o loo loma nei.
O se tasi o fiafiaga tele i le faafeagaiga, ona o le mafai ona fuafua ma faatino e tupulaga talavou, o latou lava lagona e fesoasoani ai mo le aulotu ma ana fuafuaga mo le lumanai.
Sa faamaonia mai foi e Rev Vaaelua Patu, ua leva ona umia saoloto lo latou fanua i le itu i Sasae o Aukilani mai le tele o tausaga.
Ua leva foi ona fuafua ma faataoto le manoga o le aulotu mo le galuega i le fausia o se Malumalu tapuai. Ae peitai sa iai pea vaega ma fetuunaiga ma le vaega o loo fuafuaina auala tetele a le malo i lea itu, ma ua fai ma mafuaaga o le tolopo ma faatuai ai le faataunuuina o le faamoemoe.
O le aso 14 o le masina fou, o Aperila lea, o le a faataunuuina ai le taaloga faataamilosaga tapolo i le malae i Chamberlain, 46a Linwood Avenue, Western Springs, Aukilani. E amata i le itula e valu i le taeao seia oo i le tasi i le aoauli, (8am-1pm) ae tatau ona lesitala tagata uma i le 7.30 i le taeao lava lea.
E iai foi nisi o tapenaga mo isi sailiga seleni laiti o le a faatinoina ai lava i lea aso i le nofaga lava e tasi. Ua saunia foi ni faailoga mo ‘au manumalo poo vaega foi ua vaevaeina i ai ia faailoga faapitoa.
Vaega ma aiaiga tāua e ao ina silafia
E pei ona fuafuaina e faapea, e ta‘i $300 i le ‘au taitoatolu tagata, pe o le $100 foi a le tagata e toatasi. O totogi ulufale uma e tatau ona totogi muamua, ma e faagata i le aso 12 o Aperila, a o lei amataina taaloga i le aso 14 o Aperila lava.
Mo siaki tupe uma pe afai e totogi i siaki, e tatau ona tusia agai i le EFKS Pakuranga. Afai o le a lē faataunuuina le faamoemoe i taaloga ona o nisi o mafuaaga tatau, ma suiga i uiga o le tau, o le a mafai ona toe maua uma atu tupe ulufale sa totogi e tagata taaalo. Ae manatua, afai o le a lē oo ane le tagata taalo, ae ua mae‘a ona totogi lona ulufale, ona faamalie lea, o le a lē toe maua atu le seleni (non-refundable).
O pepa ulufale uma mo le taamilosaga, o le a mafai ona maua pe a fesootai ane i suafa ma telefoni faapea ma imeli a i latou nei: Rev Vaaelua Patu (09 528 5161) vpat@xtra.co.nz; Romana Autagavaia-Fetu (021 152 9500) Pakurangers@yahoo.co.nz; Anthony Tauileva (021 076 1546).