Taamilosaga Lakapi i Samoa

Au a Tama o Fao mai le afioaga o Falevao ua manumalo i le Talita a Atua i Saute i le taaloga ma ‘Aufaga
Au a Tama o Fao mai le afioaga o Falevao ua manumalo i le Talita a Atua i Saute i le taaloga ma ‘Aufaga

O le Aso Toonai na faaauau ai taamilosaga a Iuni Lakapi ta’i tasi i Samoa. O ripoti nei o taaloga ua maua mai i le taamilosaga a le Savaii 7s, faapea le Atua i Saute ma Apia Union. O tala autu o le vaiaso o le see ese ai ma Vaiala o le Talita na nofo ma Ulalei mo se taimi umi, a’o Savaii, ua toe manumalo ai Salelologa i le taaloga faaiu o le vaiaso tolu o le Savaii 7s. I le itu i sasa’e o Upolu, ua sola Tama o Mt Fao mai Falelauvao ma le Talita a Atua i Saute.

Savaii 7’s – Vaiaso 3

Franki Tama Uli 17  Iva White Lions 12

Ua toe foi ia Salelologa le manumalo ma le talita mo le vaiaso lona tolu o le Savaii 7s. Na -manumalo ai Frankie Tama Uli 17-12, i le la taaloga ma le Iva White Lions. O le tolu ai foi lea o vaiaso o tauva ‘au ia e lua i le taaloga autu ae o le vaiaso na te’a nei na se’i ai e Iva le malo, ae o lea ua toe foi i le Tama Uli. Ua lua ai nei vaiaso o manumalo le Tama Uli, ae tasi le vaiaso na manumalo a Iva.

O Tama Uli na muamua sikoa auala ia Tipa Sapeti, ae o Ricky Ene o Iva na sosoo ai lana sikoa, misi uma a’a o sikoa ia ma tutusa ai e ta’i 5-5 ‘ai i le malologa. O Tama Uli na muamua maua ai i le ‘afa lona lua, auala ia Gasologa Pauli, ova ma le a’a tulai mai ai 12-7. Ae na toe sikoa foi Ricky Ene i lana sikoa lona lua, ma ova ma le a’a ma toe tutusa ai ma le taaloga.

Na fai ai lava faapena seia oo i le minute faaiu, ae toe sao loa ma Gasologa i le tulimanu ma sikoa ai ae ua uma le taimi, o ‘ai faaiu o le taaloga autu e 17-12 mo le Tama Uli.

O isi taaloga,  na manumalo Safotu ia Federal Pacific i le Plate 27-0.

E 16 ‘au na tauva i le vaiaso lona tolu o le Savaii 7’s, mai le 9 ‘au na tauva i le vaiaso amata, ae 12 ‘au na tauva i le vaiaso lona lua.

SCOPA ma lana talita
SCOPA ma lana talita

Apia Union – Vaiaso 4

SCOPA 23 Vaiala 18

Ua faate’i e tamaiti a’oga tuai a Samoa College le ‘au a Vaiala ma seia ai e SCOPA le talita mai le Ulalei. O Vaiala na o i le malologa ma le fiafia auā na sili o latou ‘ai 15-9. Ae o le toe foi mai na sikoa ai e SCOPA sikoa e lua i le na’o le tasi le sala na faaopoopo i ai o Vaiala.

O faaletonu o Vaiala na mafua mai  lava ia latou, auā e toalua tama na faamalolo mo le ta’i 10 minute, i le solitulafono lava e tasi, o le polokaina lea o le tagata tamo’e a SCOPA i le tuliloaina o le polo.

Toe faaopoopo iai ma le Pepa Mumu na tuli ai i tua le Vaiala mo le faaoo lima i le SCOPA. Na toe faasala ma le isi Vaiala i le Pepa Mumu, ua lua ai, ma le samasama. I taimi faaiu o le taaloga e na’o le 12 tama taalo a Vaiala na totoe i luga o le malae mai faasalaga.

Ae na faato’a sikoa le sikoa muamua a SCOPA i le minute 70 o le taaloga, ma le sikoa lona lua na maua ae ua uma le taimi.

Na faafetaia e le kapeteni a SCOPA Arnold Meredith le to’a o lana ‘au.  “Na matou tapena faalelei mo le taaloga i le vaiaso atoa. Na ou mana’o lava matou e toso le taaloga i le lava o le manava.”

Ae o lē o se auala faigofie, auā o le a aloalo mai ia SCOPA isi ‘au malolosi e iai Moataa, Vailele ma Vaimoso.  Na ta’ua e Taito Louis Lene le faiaoga a Vaiala e faapea, o se tulaga lelei tele mo le Apia Union le see ese ma Vaiala o le talita seia nofo foi ise isi ‘au.  O le a avea lea ma faavae e toe faaleleia ai Vaiala pe a toe taalo mo le talita.

Atua i Saute – Vaiaso 3

Na amata taamilosaga o le vaiaso tolu i tauvaga a le U20, na fetaui ai Falevao U20 ma Saleapaga U20. Na to’ilalo ai Saleapaga 5-13 ia Falevao, e ui e ta’i tasi sikoa a ‘au na maua auala ia Tauese Lolofie mo Saleapaga ma Farane Ah Sam mo Falevao. Ae o le a’a a Wayne Tiuga na faaopoopo ai sala e lua na maua ai ‘ai manumalo a le Mt Fao Boys.

O le isi taaloga a le U20 na tauva ai Lepa ma Aufaga. O Lepa lea na nofo ma le Talita mai le vaiaso na tea nei, ae na toe taofia e Lepa U20 le talita mo le isi vaiaso ina ua tutusa le taaloga 0-0 i le faaiuga.

O ‘au o le Senior A na taalo ai Saleapaga ma Lepa. Na fesuiai ‘ai o le taaloga e oo i le minute 75 o le taaloga na tutusa ai ‘ai e ta’i 18-18. Ae o le mea sese a Saleapaga na faasala ai ma a’a ai e William Lifaloa le sala ma maua ai ‘ai e tolu na sili ai loa ma Lepa ma manumalo ai 21-18 ia Saleapaga.

O le taaloga autu a le Senior A na taaalo ai Falevao ma Aufaga. O le ‘au a Aufaga lea na nofo ai le talita i le vaiaso na tea nei na seia mai i le taaloga ma Saleapaga, ae na suipi Falevao ina ua manumalo i le vaiaso lona 3 ma faaee ai loa ma le talita e faimalaga atu i luga o le Mafa mo lalo o le Mauga o Fao le nofoaga o le nuu o Falelauvao.

O le vaiaso o le a sau nei e faauma ai taamilosaga a Kalapu mai Savaii ae tapena ai mo le Marist Sevens e faatino i le vaiaso lona lua o le masina, 15-16 o Fepuari.