E tele le fiafia na faaalia e tamaiti o le vasega tausaga 10 o le Kolisi a Patelesio na malaga taamilo i totonu o le iunivesete i Vitoria i le Aso Lulu na tea nei. E lei malolo se tasi o le fanau na faatasi ai i lea malaga asiasi atu i le iunivesete i le faamatalaga o vaega uma na iai. O le autu o lenei malaga taamilo ina ia vaaia e tamaiti ituaiga o matata ma mataupu eseese o loo aoaoina i le iunivesete auā lo latou faagasolo mai i ai pe afai e mae‘a aoaoga i totonu o kolisi.
Sa latou taamilo atu i le itu o potutusi, faletaalo, vaega e aoao ai le faasaienisi, le numera ma tausi tusi, faapea faainisinia, musika ma itu tau aoaoga (education), aemaise le vaega i itu faatekonolosi, ma le soifua maloloina faapea le fale o mataupu tau Maori ma tau gagana Samoa.
O le vaitaimi lava lenei e feagai ai le fanau ma a latou suega faaiu o le tausaga faapea ma malaga atu e asiasi i iunivesete ma politenika, auā lava le nofo sauni atu mo aoaoga fou mo le tausaga fou.
