Taaloga e faatamatane ae mulimuli ane e matagofie i le vaai

Ua faigofie lava ona faatino ma faataunuu le galuega a tufuga tape‘a i Samoa ma atunuu i fafo pei foi o Niu Sila nei auā ua tele lava ina faamae‘aina i le 2 poo le 3 foi vaiaso pe a umi se taaga.

Ua lē masino foi manaoga o alo ma fanau i lo latou fia laeiina o le tatau ma ua faapena ai lava ona faatupula‘ia ai galuega a le au tufuga tape‘a ma ua tutusa pau ai lava ma se tagata faigaluega le tulaga ua iai nei.

O le Aso Toonai na faia ai se faatasiga ma faafoi ai le viiga i le Atua ina ua mae‘a le galuega a le agaiotupu ma lona soatau e tusa ma le 3 i le 4 vaiaso o faagasolo.
Na a‘e se lagona i alo ma fanau o le tofa ia Salu Salu ma le faletua ia Palolo Salu, le afioga ia Tagaloa Faasavalu Charlie Salu ma lona uso ia Pili Nicolas Salu ina ua o la mananao e laeiina le measina a Samoa, le tatau, ma faapena loa ona faagaioi le faasologa o le galuega a le tufuga, le afioga ia Laulu Tulouena.

Na maitauina ma vaaia le fiafia ma le mitamita o le loto i fofoga faaalia o sogaimiti ina ua mae‘a nei ma ua faaiuina ma ua faapaiaina lo laua faamoemoe e pei ona sa mafuta ai ma faafoi ai le viiga i le Atua.

Na taitaiina e le susuga i le faafeagaiga, Susuga i le toeaina Leiite Setefano ma le faletua ia Lealofisa Setefano. Lea la ua samaina tatau a sogaimiti nei ma ua faafiafiaina ai foi i laua ina ua o la laeiina nei le matagofie o lea foi measina a Samoa.

Ia faamalo Tagaloa Faasavalu Charlie ma Pili Nicolas le onosai ma le loto tetele auā o lena ua faaiuina ma le manuia lo oulua faamoemoe ia viia lava le Atua, ona e na te lei tuulafoaina lava oulua a o faagasolo lo oulua faamoemoe, aemaise foi o le faatasi pea ma le tufuga faatino lana galuega.
Afioga Tagaloa Faasavalu Charlie Salu, Susuga Faafeagaiga Leiite Setefano, Faletua Lealofisa Setefano ma Pili Nicolas Salu

O sogaimiti ma o la tuaa, Susuga Salu Salu ma le faletua Palolo Salu

O sogaimiti ma le tufuga, Susuga Laulu Tulouena

Tagaloa Faasavalu Charlie Salu ma si ona uso o Pili Nicolas Salu ua laei i le measina a Samoa