E lei tuanai ni itula o le iuga a le faamasinoga, ae susunu loa le maota o le Faasisina
Na lauina se faaiuga a le Faamasinoga o Fanua ma Suafa i Mulinuu, i le Aso Faraile na tea nei, aso 17 o Fepuari 2012, i le talosaga a Leota Leulua‘ialii Ituau Ale faasaga i le faaiuga a Alii ma Faipule o Solosolo na faia i le masina o Tesema o le tausaga na tea nei, ina ia tafiese o ia ma le nuu faatasi ai ma lona aiga.
O lea faaiuga a le faiganuu a Solosolo na mafua ina ua lē tausisia e le afioga i le Faasisina aiaiga o lona toe foi atu i le afioaga i se isi faaiuga muamua na faatulai ese ai, o le aveesea o ni ana tagi o loo i le faamasinoga faasaga i nisi o le afioaga.
E lei aveesea ia tagi ona o le aiā tatau lea o le tamalii e pei ona tamau i le tulafono faavae a le malo ma le atunuu, peitai na mafua ai ona siisii le finagalo o le faiganuu ma toe faia le faaiuga e toe faatulai Leota ma lona aiga.
O le faaiuga a le faamasinoga i le Aso Faraile ua mavae ia toe foi lē ua talosaga i le nuu ma afio ai i lona maota ma lona aiga.
Peitai e lei tuanai ni itula talu ona mae‘a ona lau le faaiuga, ae tulai mai loa se faalavelave na susunu ai le maota o le afioga i le Faasisina, poo le afioga i le taofia a le Malietoa.
O le maota atoa na faaumatia e oo i meatotino tāua sa iai i le fale. E oo atu le fuimu ua leai se maota ua i lalo uma i le malosi o le malaia, ae sa faafetaia e lei malosi le savili semanu e ono aafia ai nisi maota o le nuu.
O le tea o le tolu i le aoauli o le Aso Faraile na tea nei na tulai mai ai le faalavelave, ma e leai se soifua na aafia ai.
Faaalia e leoleo o loo suesueina le faalavelave ma le talitonuga o nisi na latou susunu le maota. Peitai e lei mautu i le taimi nei poo ai na faia.
O loo iai masalosaloga o nisi o le nuu na faia le faalavelave peitai e faato‘ā faamautuina lea mau pe a mae‘a suesuega o loo faia.
O le afioga Leota Leulua‘ialii Ituau Ale, sa avea ma faipule o le Palemene i ni paeaiga ua mavae ma o ia le Fofoga Fetalai pito talavou na filifilia a o ia umia le tofi faipule o Anoamaa i Sisifo.
O le mataupu e faasino i le faavaeina o se faiganuu fou i le afioaga, na faia i ai se faaiuga a le faamasinoga i nai tausaga e lei mamao atu.
O lea faaiuga na teena ai le faiganuu na taulamua ai le afioga i le Faasisina ma nisi o matai ma i latou sa lagolagoina.
Na toe foi i le faiganuu a Solosolo le toatele sa i le faiganuu lea seia oo ina toe faaa‘e ai ma le afioga i le Faasisina i le tausaga na tea nei.
Peitai e lei leva ni masina talu ona toe faatasia le afioaga ae toe faia le faaiuga i le afioga Leota Ituau Ale ma lona aiga, lea ua taualauga i le susunuina o le maota o lea tamalii.
