Susue le faamalama alofa o Samoa faipisinisi i Niu Sila

E 4 tausaga o se tamaititi ua aafia i le gasegase o le kanesa o le toto lea e ta‘ua o le leukemia, ua fesoasoani i ai le sosaiete o le gasegase o le kanesa i Samoa mo le faatupeina o se isi vaega o ona togafitiga i Niu Sila.

O le faia o sailiga a le sosaiete mo le faia o se fesoasoani mo se tasi o le fanau ua faafiafiaina ai i le foai e lua afe tala mai le faalapotopotoga o sootaga tau pisinisi a tagata Samoa i Niu Sila le New Zealand based Samoa Business Network, ona ua tali ai a latou sailiga sa faia mo se seleni. Faaalia e le failautusi o le sosaiete o le kanesa i Samoa o le a tuusa‘o loa le seleni ua maua mai mo le auina atu o lea tamaitiiti ma o le a totogi ai se vaega o le pasese mo se tasi o lona aiga e malaga faapea nisi o feuiuiaiga a o iai i Niu Sila lea gasegase.

O le foai lenei a le vaega o fesootaiga o tagata faipisinisi a Samoa i Niu Sila ua latou foai foi se isi lua afe tala mo galuega fesoasoani o loo faia e le faalapotopotoga o le Toomaga mo ē Puapuagatia, e pei ona sa avea ai le pule faatonu o le pisinisi lafo tupe faamomoli o le Pacific Ezy Money Transfer mai Niu Sila, le afioga Muliagatele Faimalo Allan Stowers ma o latou sui i le tauaaoina o lea meaalofa tupe.

Faaalia e Muliagatele o se sailiga tupe a le Samoa Business Network na maua ai ni seleni, lea ua auala mai ai le fesoasoani. O le fiafiaga lea o le peresetene o le Toomaga ma le sui o le sosaiete o le kanesa i Samoa, ona e ui ina galulue i Niu Sila nisi o le atunuu ma faatino ai a latou pisinisi, ae lē mafai ona galo mai le atunuu ma ana taumafaiga e ala i faalapotopotoga tumaoti o loo fesoasoani i mafatiaga o le atunuu i soo se itu.

O le agaga faafetai o faalapotopotoga tumaoti ua afea a la galuega fesoasoani i le agalelei o le Samoa Business Network i Niu Sila e iai le faamoemoe o le a faaauau pea i tausaga oi luma. Faaalia e le failautusi o le sosaiete o le kanesa, e faalagolago uma a latou galuega i foai tupe e maua mai tagata o pisinisi ma faalapotopotoga o loo maua mai ai fesoasoani.

O le mau foi lea a le Toomaga latou auā o tautu a ia faalapotopotoga tumaoti, a lē seanoa ma foai maua fua, e lē mafai ona faatino le autu o a latou galuega fesoasoani i tagata. E lē o se taimi muamua lenei ua faatino ai e le sosaiete o le kanesa se laveai mo nisi o tagata ua maua i le kanesa ma o le latou tatalo, ia faaosofia pea le agaga fesoasoani atu i tagata o loo fia maua se fesoasoani.

O le masina nei e faamanatu ai le atoaga o le 10 tausaga o le Toomaga mo ē Puapuagatia, ma o le lua afe ua latou maua o le a alu sa‘o i le tausiga o fanau ua sauaina ma o loo nonofo nei i le nofoaga mo tagata faapea.Le Peresetene o le Toomaga mo ē Puapuagatia, ma le sui o le sosaiete o le gasegase o le kanesa i Samoa i le ogatotonu, ma sui o le Pacific Ezy Money Transfer na latou foai le meaalofa tupe mai le Samoa Business Network i Niu Sila