Ua faatumauina le filifilia o Tuisa Tasi Patea na te umia le tofi faipule o Sagaga Le Falefa, ina ua teena ma faalēaogāina e le faamasinoga le tagi tau palota na faaulu e le afioga Loau Solamalemalo Keneti Sio, o lē sa avea ma faipule o le itumalo i le paeaiga a le Palemene talu ai.
Ua faamaonia e le faamasinoga le tulaga agavaa o Tuisa e tauva i le palota e tusa ai ma le vaega limavalu o le tulafono o faigapalota. Sa finau le it tagi e 49 aso sa lē atoa ai le 240 aso o tausaga taitasi e tolu sa tatau ona nofomau ai Tuisa i Samoa ona faato‘ā agavaa lea e avea ma sui tauva o le palota.
Peitai o suesuega a le faamasinoga o palota na faamaonia ai o le afioga i le faipule na siitia mai ma nofomau i le atunuu i le tausaga e 2006.
O le tausaga e 2008 na malaga ai mo ona tiute o se tasi o faatonu a le kamupani o le EventPolynesia i Niu Sila i le faia o tapenaga mo ni fusuaga faapolofesa.
O le EventPolynesia o se kamupani o loo lesitala faaletulafono i Samoa.
Na faaalia i le faaiuga a le faamasinoga, o le tuua ai o Samoa e Tuisa i ni vaitaimi o lea tausaga, sa mafua ona o ona tiute o se faatonu o le kamupani.
Sa malaga mai i Samoa le faauluuluga o le kamupani le tofa Pa‘u Teleiai Edwin Puni, mo le tuuina atu o lana molimau e lagolago ai le itu a le faipule.
O le Komesina o faigapalota le isi sa faasaga i ai le tagi a Loau. O le tasi o vaega o le faaiuga ua lē mafai ai ona faamaonia tuuaiga a Tuisa o faatosina faaalatua faasaga ia Loau Solamalemalo Keneti Sio ma ua faalēaogāina.
Ae mo le Komesina o faigapalota ma lona ofisa, ua poloaina e le faamasinoga na te totogi le tau atoa o le faamasinoga.
O le totogi o gaoioiga uma a le itu tagi, ma le totogi e $5,000 mo le itu a le faipule.
O lea seleni e totogi ai foi ma pasese o molimau a Tuisa na malaga mai Niu Sila mo le faamasinoga.
Na molimauina e le faamasinoga le iai o se lape i le faatinoga o galuega a le Komesina ma lona ofisa i le faitauina o aso lea na tautino le Komesina i lana molimau e lei atoa.
Peitai ona o le vaega limavalu o le tulafono o faigapalota sa agavaa ai lē na faasaga i ai le tagi e tauva i le palota.
Soloia le tofi faipule o Aleipata Itupa i Luga
O le mataupu i le tagi o le palota mai le itumalo o Aleipata Itupa i Luga, ua soloia ai le tofi faipule o Seuala Taua Kitiona Tavaga Seuala ina ua faamaonia moliaga e 12 o faatosina faaalatua i le tuuina atu o tupe, le vaiinu ma taumafa i nisi o tagata palota.O le vaevaeina o moliaga ua faamaonia e faasino lea i le valu o tuuaiga o faiga faalatua poo le bribery, ma le 4 o tuuaiga o gaioiga faatosina o le tuuina atu o meaai ma vaiinu poo le treating.
Ua faamaonia foi moliaga o lē na ia faaulu le tagi le afioga Kasimani Lautusi. E 6 moliaga o faatosina faaalatua ae 2 moliaga o faatosina na faia i se auala e tauanauina ai le lagolago a tagata, le treating.
O Seuala o se faipule o le HRPP ma sa avea ma Minisita o le kapeneta i le paeaiga a le Palemene na faataape i le amataga o le tausaga nei a o loma le isi palota i le aso 4 o Mati 2011.
O le Aso Gafua o le vaiaso nei, aso 16 o Me 2011 o le a lauina ai le faaiuga i le tagi tau palota mai le itumalo o Faasaleleaga Numera Tasi, i le va o Pauli Pipi Tevita Tariu ma le minisita o Aoga, Taaloga ma Aganuu, Magele Mauiliu Magele.
O le Aso Faraile na tea nei na amata ai ona suesueina le mataupu mai le itumalo o Palauli le Falefa, i le tagi a Le Tagloa Pita faasaga i le afioga Faumuina Tiatia Liuga, le Minisita o Tupe.
O le vaiaso lenei e tatau ona mae‘a ai foi ona suesue molimau i le tagi tau palota mai le itumalo o Satupaitea.
