Ua lua nei tausaga e lē o auai se Tausala Samoa mai Niu Sila i le sailiga o se Tausala o Samoa i le vaiaso o le Teuila.
Ua silafia e le toatele le mafuaaga o lea suiga ona o fuafuaga a le Komiti e pulea le Tausala Samoa NZ.
Peitai o le tausaga nei ina ua faaulu suafa o ni tamaitai e fia tauva, e lei nofoai nisi o tamaitai talavou o le atunuu o loo mau ma alala i fafo i Niu Sila ma Ausetalia sa lesitala mai suafa mo le fia tauva, e aofia ai le tamaitai o Janine Tuivaiti ma Mafutaga Tautai o Ausetalia.
O se tulaga lelei lea i se lagona o se tasi o le komiti o le tauvaga na fesili i ai. O le mau a le sui lea na ia faamatala ai, o se itu tāua auā e iloa ai le naunau mai pea o alo tamaitai o le atunuu o loo ola ma soifua i fafo e auai i faigamea a le atunuu i taimi o Teuila.
O Janine o loo aoaoina nei i le Iunivesite i Aukilani ma e mau ai foi le tamaitai ma lona aiga i ona mātua uso ma tuagane.
O se tasi sa galue o se tagata faasalalau i le alaleo o le Fofoga Samoa saili Malo a le susuga Faiumu Faletuai, ae sa maua foi lea avanoa e galue ai i le leitio o le NiuFM i Aukilani lava.
O ia o se tamaitai na soifua a‘e i se olaga kerisiano e pei ona ia faaalia ai ma e talitonu tele i mau o aoaoga faalelotu e soo se mea e mafai pe a faalagolago ma talitonu i le Atua. O ia le tamaitai pito talavou mai tamaitai e toaono sa tauva, e 20 ona tausaga.
O le feiloaiga ma le tamaitai o Janine i le fono ma tusitala a o lei faia le tauvaga na matauina ai uiga tausaafia o le tamaitai e ala i lona laufofoga fiafia i taimi uma ma talanoa i tusitala i mataupu sa fesiligia ai.
Na faia ai lava le faaiuga a le tusitala o le tamaitai tonu lea e tatau ona pale i le Tausala Samoa 2012.
E matuā lelei lana tautala faasamoa e ui sa ola a‘e i Niu Sila, ma o se isi lea e tulaga ese o ia i se mātau a lo‘u tusitala e masani ona faatalanoaina tamaitai tauva o le Miss Samoa pe a oo i taimi o le Teuila.
O le naunautaiga o Janine e pei ona ia faailoa i lea feiloaiga ma tusitala, ia avea o ia ma Tausala e faalauiloaina Samoa i le atinae o tagata tafafao. Lea ua taunuu lana miti ina ua faapaleina i le po o le Aso Faraile, 7 Setema 2012 na faatino ai le sailiga o se tausala o le atunuu.
O le faaiuga lenei o le tauvaga:
Faailoga Autū
Winner/Miss Samoa (Manumalo): Miss Thomsen’s Bridal Couture
1st Runner Up (Tulaga 2): Miss Penina Day Spa & Indoors
2nd Runner Up (Tulaga 3): Miss Lavashe Couture
3rd Runner Up (Tulaga 4): Miss Lalelei o Samoa
Consolations Prizes:
Miss The Edge Cocktail Lounge & Miss Treasure Island Boutique
Best Talent:
Miss Thomsen’s Bridal Couture
Best Interview:
Miss Penina Day Spa & Indoors
Faailoga Faapitoa
Best Traditionally Inspired Attire:
Miss Penina Day Spa & Indoors
Best Sarong:
Miss Penina Day Spa & Indoors
Best Puletasi:
Miss Penina Day Spa & Indoors
Miss Internet:
Miss Penina Day Spa & Indoors
Miss Personality:
Miss The Eden’s Cocktail Lounge
Miss Photogenic:
Miss Thomsen’s Bridal Couture
Miss National Tourism Award:
Miss Lalelei o Samoa
