Suipi Moataa i le Taitoafitu a le Iuni Lakapi a Apia

E na’o le 16 ‘au taitoafitu sa tatau ona faagasolo ai le taamilosaga taitoafitu a le Iuni Lakapi Faaitumalo a Apia i le Aso Toonai na tea nei i le malae o le Iuni Lakapi a Samoa i Tuanaimato. E iai nisi o ‘au e lei mafai ona auai atu i lea taamilosaga ae na faaauau pea lea Taitoafitu ma le naunautaiga o le Iuni Lakapi Faaitumalo lenei a Apia, e tapena ai ‘au taitasi mo le taamilosaga Taitoafitu faavaomalo a le Malisi lea ua faamoemoe mo le aso 14 ma le 15 o le masina lenei o Fepuari.
O le lona lua ai lenei o taamilosaga taitoafitu mai i Iuni Lakapi faaitumalo ua mafai ona faataunuu a latou taamilosaga taitoafitu mo le amataga o le tausaga lenei e pei ona sa amata mai e le Iuni Lakapi faaitumalo a Anoamaa i le lua vaiaso talu ai. I le taitoafitu lenei a le Iuni Lakapi faaitumalo a Apia na matietie ai foi i luga le tulai mai o ‘au masani a le Iuni Lakapi faaitumalo a Apia e pei o Vaiala, Vailele, Apia ma Moataa.
I le sailiga siamupini mo le Ipu autu na sailia lea e le ‘au a le afioaga o Moataa ma le ‘au e tasi mai le motu tele i Salafai, le Tamauli mai Salelologa. O se taaloga finau tele lea taaloga e ui na malosi le osofai a Moataa i le ‘afa muamua lea e ta ane le malologa o sili ‘ai o Moataa e 12 i le leai a Tamauli mai Salelologa.
O sekone amata o le ‘afa faaiu na muamua ona maua ai le uluai ‘ai mo Tamauli ina ua sikoa ai se tasi o sui malosi o le Tamauli le susuga ia Tipa Sapeti. E lei faavaivai ai le finau atu o Moataa ma o latou faoa ai se tasi o polo mai lima o Tamauli, ma maua ai le isi sikoa faaopoopo mo Moataa. Na toe maua le sikoa mulimuli mo Tamauli mai le latou uigi saoasaoa ia Pesamino Iakopo peitai ua fai si tuai tele mo Tamauli ona ua mae’a le taimi o le taaloga.
O Moataa na sao mai i le pulu na tausinio faatasi ai ma SCOPA 1, Moamoa ma le Punialavaa, ae o Tamauli na manumalo mai i le latou pulu faatasi ai ma Vailele, Apia ma SCOPA 2. O le manumalo ai o Moataa i lea taamilosaga taitoafitu o se fiafiaga tele lea mo le alii faiaoga ia Ripine Fualau, e pei ona ia ta’ua, e lei faigofie mo latou le ‘au lenei mai Savaii le Tamauli ona o le toatele o nisi o sui koleni o le ‘au taitoafitu a le Manu Samoa o loo taaalo mai ai, peitai ua faafiafiaina o ia ma le pulega ona o le taumafaiga a Moataa na iai i lea taamilosaga taitoafitu. O loo tele nisi vaega e manatu Fualau e tatau ona faaleleia mo le tapena atu ai o Moataa i le taamilosaga taitoafitu tele a Malisi i le vaiaso fou.
Ae mo le ‘au a Tamauli mai Salelologa i Savaii, na faafiafiaina le alii faiaoga ia Matamua Junior Salima ona o le maua ai o le latou avanoa e tausinio ai i le taamilosaga lenei a Apia Rugby Union ina ia tapena mamao i ai le latou ‘au mo le taamilosaga taitoafitu a Malisi i lenei tausaga. Saunoa Salima, e ui ina latou malolo ai i le sailiga siamupini, ae o loo tumau pea le faagaeetia ona o taumafaiga a lana ‘au mai Savaii. O le a faaleleia atili foi nisi o vaega o manaomia ona toe faaleleia mo le agai atu ai i le vaiaso fou i le taitoafitu a Malisi. E $1000 le faailoga tupe na manumalo ai Moataa ae $600 mo Tamauli mai Salelologa i Savaii.