O fuafuaga faataoto a le Asosi a Tama Tuai o le Malisi i Kuiniselani (Qld Samoan Marist St Joseph’s Old Boys & Sports Association Incorporated) e tusa ai ma vaega maioio o le Faavae/Constitution e ao ona faia le fono faaletausaga i totonu o le 6 masina mai le faaiuga o le Tausaga Faaletupe (Financial Year). Ma o le Financial Year la a le Asosi e mai ia le aso 1 Iulai o le isi Tausaga seia oo atu i le aso 30 Iuni o le isi Tausaga e sosoo ai.
Ma o se agaga faafetai i le Atua ona ua aulia mai ma le manuia lenei Aso e tusa ai ma fuafuaga mamao a le Asosi.
O le tele o fuafuaga na feagai ma le Asosi i lenei Tausaga, aemaise lava o lana Laulau a Fono, sa feagai ai ma le mamanuina o le Faavae ina ia avea o se Faavae lava na liliu i ai le tofa ma le utaga a Tama Tuai.
Ma o lenei galuega tele o le Faavae sa nafa taulimaina ma faatinoina e le Failautusi o le Asosi – Leautuli‘ilagi Malaeoalii Sogialofa Vaa Leapai faatasi ai ma le lagolagosua a le Laulau poo le Executive Management a le Asosi a Malisi.
E lē gata i lea a o nisi o galuega sa mafai ona faatinoina e i latou sa nofoia le Laulau a Fono a le Asosi i le 12 masina ua mavae atu.
Ma o se mitamitaga lea o le mamalu o sui resitala uma faaletupe (Financial Members) a le Malisi ona ua tino mai le tele o vaega uma sa fai ma ponatia o le agai i luma o le Asosi, ma ua tafa ai ata o Tauleleia ina ua oo mai i le Fono Faaletausaga o lenei Tausaga ua leai ma se vaega o toe faaluafesasi i ai le aga‘i i luma o le Asosi a Tama Tuai o le Malisi i Kuiniselani.
Na usuia lenei fonotaga i le Aso Toonai, 24 Novema 2012 i le nofoaga a le St Paul Catholic Church Parish Hall i Woodridge. Ma o le Aso Toonai la na usuia ai le Fonotaga Faaletausaga (AGM) a le Asosi e tusa o aiaiga faaletulafono a le Asosi e pei ona lesitalaina ai aloaia i le Malo ma avea ai ma Tino faatulafono (Incorporated Association).
Ma o le iuga la lenei o le faiga filifiliga a le Asosi mo so latou Ofisa fou. Ina ua mae‘a ona tolaulauina ripoti tusitusia Faaletausaga, e pei o le Tala Faatatau o le Tupe mo le Tausaga atoa, a o le Ripoti aloaia a le Afioga i le Peresetene e pei ona tolaulauina auā le aga‘i mai o le Asosi i lena 12 masina na feagai ai ma le Faalapotopotoga.
Na mae‘a loa ona faamavae sui uma o le Laulau a Fono tuai, ona alo loa lea o le Malisi mo le latou faiga filifiliga mo le Ofisa Fou o le Asosi ma lana Komiti Faafoe. Ma o le faiga filifiliga lenei a le Malisi, afai o ai o le a pale mai mo le Laulau a Fono, o lona uiga e lua Tausaga le nofoaiga lenei e tusa ai ma le Faavae/Constitution.
O aiaiga o nei tofiga o lona uiga e amata mai i le taimi nei, 2012 seia oo atu i le 2014, ona toe filifili foi lea o se isi Laulau a Fono fou mo le tauaveina o le Asosi.
Ofisa Fou mo le 2012 – 2014: Peresetene – Afioga Muagututi‘a Ikenasio Soo Choon; Sui Peresetene – Afioga Tofa Lefineali‘i Li‘o Tomasi Maiava; Failautusi Aoao – Leautuli‘ilagi Malaeoali‘i Sogialofa Vaa Leapai; Teutupe – Afioga Taito Antonio Taito Washburn; Sports Coordinator – Philip Pama; Assistant Sports Coordinator – Susuga Faalogo Usoga ‘Al.
Ma o le Laulau a Fono lenei ua filifilia mo le faatautaia ma le taitaiina o le Asosi a Malisi i Kuiniselani mo le lua (2) tausaga seia aulia le 2014 e tusa ai ma le Faavae.
O fuafuaga ua taoto ai i lagotonu fuafuaga a Asosi a le Ekalesia Katoliko, afai ae mae‘a se faiga filifiliga mo ana Laulau a Fono uma mai Asosi a Tama ma Teine tuai o Kolisi tetele a le Ekalesia Katoliko e aofia ai ma le Malisi, ona faaauauina pea lea o tiute latou faaleofisa, ae o le faauuina ma le faapaiaina o nei Tofiga ua fuafua uma e faatinoina i le taimi e fai ai le Misasa Tuufaatasi (Combined Mass) e pei ona fai i Tausaga taitasi e le Afioga ia Patele Epati Tamati.
Ma o lea la ua taoto foi le vaega lea ua mae‘a ona alauta ma ua fuafua e faatinoina lea i le masina o Ianuari 2013 ma faapaiaina ai nei tofiga faatasi ma isi laulau a fono (Executive Management) mai isi Asosi a le Ekalesia.
Ma e avea lenei avanoa e talo atu ai ma valaau atu i Tama Tuai uma o le Malisi o loo alala i laufanua o Kuiniselani, afai o e fia mafuta mai ma auai mai e lagolago le tatou Asosi e maua ma tele le avanoa e te auai mai ai ma tausoa faatasi le tatou avega ma tatou nutimea faatasi e faatino lo tatou loto Malisi ma manatua ai pea le punavai o le atamai na a‘otauina ai lo outou soifua ma so matou ola a‘oa‘oina.
