E ta‘i lua tausaga ma usuia fonotaga a le Matagaluega AOG Itu palagi a Ausetalia, e pei ona faatasi mai ai susuga i faafeagaiga ma faletua, faapea sui e toalua mai Ekalesia taitasi e 49 sa fai ma sui usufono, lea na amataina i le Aso Faraile, aso 11 o Novema. E tele ni mataupu tāua na soalaupuleina i lenei fonotaga auā le agai atu i luma ma le solosolo lelei o le galuega i Ausetalia.
O le isi vaega tāua sa faataunuuina i le Aso Toonai, o le filifilia lea o tofi o le Matagaluega AOG Palagi a Ausetalia. Na tasi ai le faafitiga o ‘aleaga i le susuga ia Pr Onesemo Pulepule e avea pea ma taitai o le Matagaluega Ausetalia, o ia foi o le Taitai Aoao a le Ekalesia i le lalolagi atoa.
O le a toe usuia le isi fono tele i le tausaga e 2013 pe a tusa ai ma le finagalo o le Matai e aulia atu i se ola ma se malosi. Na faamae‘aina mataupu o le fono ma tapunia ai i le afiafi o le Aso Sa, aso 13 Novema ae toe foi atu sui usufono uma i nuu ma alalafaga faapea Ekalesia.
O le tofa ia Poulava Sam ma Lorna o le Uncle Sams Catering sa tapenaina le fofoga taumafa.
O tofiga nei na filifilia ma faapaiaina i sauniga masani o le Aso Sa, aso 13 Novema 2011:
Taitai Matagaluega AOG Itu Palagi Ausetalia – Ps Onesome Pulepule. Sui Taitai – Ps Kiki Taulalapapa. Failautusi – Ps Komisi Lealamisa. Teutupe – Ps Enele Tagata Tailiki. Sui o le Komiti – Ps Alaivanu Toma (Taitai foi a Kuiniselani), Ps Taito Fepulea‘i, ma Ps Alofi Tuigamala.
