O le tulimatai ai e le atunuu o le aso 29 o le masina fou o Tesema e faatino ai le suiga o aso, lea o le a aso tutusa ai Samoa ma Niu Sila, o le a lē maua ai le aso 30 o Tesema, le Aso Faraile, ae sui sa’o i le Aso Toonai, 31 o Tesema.
O se suiga o le a lē maua ai le amataga o le Sapati a le Ekalesia Aso Fitu o le Toe Afio Mai, lea e amata faamamalu i le ta o le 6 i le afiafi i le goto o le la.
O le suiga o aso o le a misi ai le Aso Faraile ae oso sa’o le faitauina o aso i Samoa i le Aso Toonai ma tutusa ai ma Niu Sila, ona faamamalu faatasi ai lea o le faaiuga o le tausaga i le vaeluaga o le po o le Aso Toonai a malama le Aso Sa, le aso muamua o Ianuari o le tausaga fou 2012. O lona uiga o le a lē fetaui ma le faitauina o aso e pa’ū i ai le sapati a le ekalesia Aso Fitu i Samoa e pei ona iai le faitauga o aso i le taimi nei. Sa faatalatalanoaina lenei tulaga e se sui o lea tapuaiga na malaga mai fafo ma taitai o le ekalesia i Samoa, lea ua faaalia ai o le a faamamalu le Sapati i le Aso Sa, auā a fua i ai o le Aso Toonai lea i le faitauga tuai o aso i Samoa. O lona uiga o se taimi muamua lea o le a tasi ai le Sapati e tapuai uma ai ekalesia kerisiano i Samoa ua masani i le Aso Sa, ma le Ekalesia Aso Fitu o le Toe Afio Mai.
Na pau lava lea o le taimi o le a tupu ai lea tulaga ona o le suiga o aso, ae o le vaiaso e sosoo ai o le a toe foi ai lava le Sapati a lea ekalesia e amata faamamalu i le ta o le 6 i le afiafi o le Aso Faraile e sosoo ai ma le Aso Toonai o le latou Sapati e pei ona masani ai, e pei ona faaalia e se sui o le ekalesia. Ua faaalia i se lipoti a le upega o faamatalaga o le Talamua, o le fono a sui o lea ekalesia e faatalanoa ai le mataupu, ona ua lagalagā lagona o le autapuai o le ekalesia o aumau ma nonofo i Ausetalia, i le leai o se leo o le ekalesia i Samoa e faailoa ai i le Malo le aafia o le latou Sapati i le suiga o aso.
O se sauniga lotu a se tasi o aulotu o lea ekalesia i luga o se tasi o fale televise i le vaiaso ua mavae, na faailoa lautele ai e se tasi o faafeagaiga lea tulaga ma sa fautuaina ai e le faifeau le ‘au talitonu ma le ‘au tapuai o le ekalesia, e leai se mea e vevesi ai i le suiga auā o le a toe foi lava i le tulaga ua masani ai le ekalesia pe a mae’a ona faatino le suiga o aso.
Faaalia e nisi o le ekalesia, o se mataupu sa silasila toto’a i ai ona o talitonuga faavae o le Ekalesia Aso Fitu, ae ua maua le faaiuga e faaauau pea le Sapati i le faaiuga o le vaiaso o le a faatino ai le suiga o aso, e tusa ai ma le faitauga tuai o aso, ae oo loa i le vaiaso e sosoo ai ona suia loa lea i le tulaga o le a faitau ai aso ma tutusa ai aso a Samoa ma Niu Sila.
