Suia tulafono i filifili loka a leoleo

O loo toe tilofaia e le matagaluega o leoleo le faaleleia atili o taiala poo tulafono i le faaaogaina o filifili loka a leoleo (handcuff) lea e masani ona loka ai lima o nisi ua aafia i se solitulafono, ina ua matauina ma ioeina foi e malu o le malo, o loo iai nisi o i latou o loo solia tulafono o le faaaogaina o nei meafaigaluega, e pei lea o le loka atu o o latou lima faatasi i lima o pagota.
Taua e le pule lagolago o le faatautaia o galuega a leoleo, Superintendent Tony McLeod, e le o se faiga lea e faatagaina ona fai, le loka faatasi o le lima o se leoleo ma le lima o se pagota o loo ia vaavaaia.
O loo teena e leoleo o le falepuipui lenei suiga aemaise o loo faatalitalia pea i latou e faaauau ona faia lea faatulagaga. Ma i se tusi na tusia e se tasi na galue muamua o se leoleo mo le 23 tausaga, Stu Dever, e pei ona ia tusia i le mekasini o tala eseese mai leoleo, o loo ia tuuina atu ai se lapataiga i se lamatiaga e ono oo i ai lenei faiga.
Fai mai Dever, o le toatele o pagota ia o loo vaaia atu i le televise le loka agai i leoleo, e matua le mafai lava ona faamautinoa i taimi uma so latou tulaga sologa lelei, o le tele foi o taimi e fesuisuiai o latou uiga.
Taua e Mr McLeod, ua toe faia nei ni faafouga i taiala o le auala e faaaoga ai nei meafaigaluega a leoleo. Afai e moomia ona loka ni pagota i nei filifili loka, e tatau ona loka agai i tua o latou lima, pe loka faatasi ma le lima o se isi pagota, ae lē o le loka faatasi ma le lima o se leoleo. Na iai se tasi faalavelave na tulai mai, na tui ai e se tasi pagota se leoleo na loka faatasi isi o la lima.
Peitai mo pagota sili ona faafitauli, o loo faaaoga ai pea lenei faiga, aemaise lava le taimi e agai atu ai ma se leoleo e ave i se falemai. O lenei faiga ina ia tau tuu itiitia ai le faafitauli o loo tulai mai pea, o le faaaoga e pagota o na avanoa e sosola ese ai.