Suia le au fai polokalame a le Tagata Pasefika

O le Aso Tofi o le vaiaso talu ai, aso 10 o Setema, sa toe fai ai se suiga poo se isi amataga fou mo le polokalame a le televise tasi (TVOne) mo tagata Pasefika lea e pei ona iloa tele ai o le “Tagata Pasefika. O lea suiga, ua faia, ua suia ai nei i laua e pito i luma o le polokalame poo i laua foi nei e fofogaina mai lea polokalme i luga o le televise, lea sa masani ona tautua mai ai nisi foi alo o Samoa, le tamaitai o Beatrice Faumuina ma le alii o Robbie Magasiva.
O le suiga la ua iai nei, o le a suia ai foi i nisi lava alo o Samoa, le tamaitai o Angela Tiatia, ma le alii o Tom Natoealofa. Ma e pei ona faailoa mai i le vaiaso talu ai, o suiga fou ia ua maea ona faamaonia e le pulega o lea foi polokalame, ma o le a amataina i le vaiaso fou. O le polokalame a Tagata Pasefika, a le televise tasi e te silasila i ai i po o Aso Tofi i le ta o le sefulutasi, ma lona toe faasalalauina i le 7:30 i le taeao o le Aso Sa.
O le alii o Tom Natoealofa, sa fanau o ia i le falemai i Middlemore, ma soifua ae ai i Otara, i Aukilani i Saute. E lua tausaga sa aoaoina ai o ia i le kolisi a Tangaroa, mulimuli ane toe faaauauina lona taumafai i le aoga maualuga a De- La-Salle i Magele i Sasae.
O lona tama o le Samoa a o lona tina e mai Siamani ma Samoa foi ¼ Siamani ae ¾ Samoa. O ona matua uma e mai le afioaga o Poutasi i Falealili i le motu i Upolu.
Faailoa e le alii o Tom, o le tofia o ia ma avea ai o se tasi o lea polokalame, o se amataga lelei lea mo lona taumafai i lea foi ituaiga galuega o faasalalauga i luga o televise. E le gata i lea ae o se faamaoniga foi lea i lona aiga, o lona taumafai i le tulaga tau aoaoga, ma galuega sa ia taumafai malosi ma gapatia ai mai tausaga ua mavae, a o iai i lona olaga aoaoina.
O Tom sa uluai vaaia i luga o polokalame a le televise i se ata ua faaigoaina o le Dawn Raids (Lead Sione), Our Street, atoa ai ma le Blood Wedding (Lead Leonardo)
O le tamaitai o Angela Tiatia o loo auai nei i se tasi o ata lauiloa i totonu o Niu Sila, le Shortland Street atoa ai ma le tele o isi polokalame e pei o le faaaogaina lea o lona tagata mo le maketiina o laei poo lavalava.
O Angela sa soifua ae i lona aiga i Otara, Aukilani i Saute, i lona soifua ae o se teineititi, ona toe agai ane lea ma nonofo i Manukau i Aukilani i Saute lava. O le isi vaega tele o lona aiga e aumau i Grey Lynn i le aai o Aukilani, ma na taua e le tamaiatai o le isi lea vaega o lona soifuaga e fiafia tele i ai, o le mafuta faatasi ma ona matua, ma le lautele o lona aiga.
Sa iai foi se taimi o le soifuaga o Angela a o talavou, sa faatasi atu ai i Samoa ma mafuta i se tasi o tuaa o lona tuaa (grandmother) i Fagamalo ma Lelepa i le motu tele i Salafai
O se molimau a lea alo o le atunuu sa ia faailoa ai, e fiafia tele e mafuta ma milo faatasi ma tagata Pasefika. O le mafuta ma tagata Pasefika, o se moilimau ola ma le lelei lea ia te ia ma lona olaga, ma e fiafia tele foi i suiga o le olaga aemaise i lona tulaga ua iai nei o se tina, avea o ia o se tamaitai fiafia i tusigaata, avea o ia o se tamaitai Samoa toe Niu Sila, ma o ia vaega uma o le olaga, ua ia matua talia ma faafetaia, ma le agaga fiafia.
Na amata mai le soifua talenia o le tamaitai o Angela i le 17 o ona tausaga, ma sa fiafia tele i lea taimi e tuuina atu o ia, e fai ma faataitaiga mo nisi teine talavou o Niu Sila i le tulaga o aga faatamaitai, aemaise o le laeiina o laei ma teuga faa-Niu Sila.
Mulimuli ane sa fiafia e auai, ma avea o se tamaitai e faatinoina ni vaaiga i ata tifaga e pei o le ata o le Shortland Street, sosoo ane ai ma le Sione’s Wedding, o le Street Legal, Rapa Nui, ma le ata lauiloa o le Xena ma le tama masomasoa o Hekulasi (Hercules.)
E lei mamao tele atu sa galue ai o ia i le pueina o faasalalauga i luga o televise faavaomalo, sa avea ai foi o ia ma tamaitai autu o lea foi polokalame, a o iai i le iunivesete i Aukilani. O le taimi nei oloo aoaoina pea Angela i le iunivesite o Aukilani mo le sailia o lona faailoga o le Bachelor of Visual Art, ma e faamoemoe e maea i le faaiuga o le tausaga fou.
E toatasi le alo tama o le tamaitai o Angela Tiatia, ma o loo mafuta ma lana paga alii i le taimi nei. Ua mafai nei la ona tatou silasila i le tamaitai o Angela Tiatia ma le alii o Tom Natoealofa mo le taimi muamua i le polokalame Tagata Pasefika i le ta o le 11 i le po o le Aso Tofi nei, ona toe faasalalauina lea lava polokalame i le taeao o le Aso Sa i le 7:30.
O le suiga ua iai nei o le a faatumauina lava lea, seia iai foi nisi suiga pe a manaomia i se taimi o i luma