O le upu masani, “E faigofie ona feiloai ae faigata ona taumavae, ma e lei faigofie i le faletolu i matagaluega Metotisi o Halswell, Addington ma Kalaiesetete ona faamavae atu i le susuga i le tausi matagaluega, Rev Ropeti Enoka ma le faletua o Luisa lea ua siitia atu nei i le matagaluega i McQuarry Field i Sini Ausetalia la te tausia le aulotu lea mo le isi fitu tausaga seia pule mai foi le Koneferenisi aoao.
E tusa ai ma le tusi tofiga i le mae‘a ai o le Koneferenisi aoao a le Ekalesia Metotisi i le masina o Iulai, o Sini Ausetalia lea ua tofia e galulue ai i laua mo le isi fitu tausaga.
O le susuga ia Ropeti Enoka ma le faletua e siitia ese mai nei i le la matagaluega i Addington o laua tauaveina le tofi failautusi o le Sinoti a Niu Sila i Saute, e fitu foi tausaga sa laua vaaia ai lea tovine a le Atua, ma sa laua tausia foi nisi o matagaluega pei o Neiafu, Siusega ma autovaa mai ai i Taita i Ueligitone, faasolo mai ai i Saute, lea la ua suia laau o le faatoaga agai atu i Ausetalia.
E toafa o la alo, nisi ua faaiuina aoga mai le Iunivesite i Canterbury, o laua afioaga o Aleisa, Vailoa Aleipata, Manono ma Vaigaga.
O le Aso Sa na tauaofai ai le falelua o Halswell o loo taitaia e le susuga Rev Poasa Leaupepe ma le faletua ia Saeni, faapea Kalaiesetete i lalo o le taitaina a le tausi matagaluega Rev Ale Palelei ma le faletua Melelina i le latou sauniga o le faamanatuga ma le lotu faamavae mo le failautusi ma lona faletua.
Na taitaia le sauniga e le susuga Ropeti Enoka i le malumalu o “Ieova Irae” i Kalaiesetete ma faamamafaina ai e le taitai i lana lauga le alofa laveai o le Atua, e ui ina taumavae i nofoaga ae e lē o faamavae ma le galuega faa-Metotisi, o loo feiloai pea e ala i le alofa tunoa o le Atua soifua.
Na mae‘a le sauniga ona alo atu lea i le toonai na saunia ma tapenaina e le falelua, faapea foi saunoaga ma fetalaiga taumavae o aso faapenei aemaise nai pelega o le galuega a le Atua e ala i nai faaaloaloga laiti na saunia.
Talu ai o le susuga i le tausi matagaluega e auai i totonu o le mafutaga a faifeau o Kalaiesetete, lea foi la ua alo atu lea lava mafutaga mo se latou foi faamavaega i le vaiaso fou, aemaise foi le sinoti a Niu Sila i Saute.
O aso foi faapenei i le fesuiaiga o laau o le faatoaga, e faapena ona pisi ma nofo tapenapena nai aiga o le faifeau ma le faletua, auā e fai foi o le faamavae atu i le aulotu ua tuua, ae o le momoliina i le nuu fou ma le aulotu o le a galulue ai.
E va i lupe maua le alofa o le Atua, e maua ma toe maua ma tatou olioli ai faafaleseu, ae o le mavaega i Manu, feiloai i Manu, o le mavaega ua lagisoifua i le Agaga Paia e fai ma tafatafa o le galuega momoli tofa.
