Aisea ua toe sui ai le fa’ai’uga a le palemia? Tautua Samoa party
Ua fesiligia e le taitaifono o le vaega faaupufai o le Tautua Samoa le tofa Lealailepule Rimoni Aiafi, le mafuaaga ua suia faafuasei ai faaiuga a le Malo e pei ona iai se iugafono a le Kapeneta ua faatonuina ai faauluuluga o Matagaluega ma Faalapotopotoga a le Malo, e sui uma taavale o loo tutu foeuli ile itu tauagavale, ao sauni le atunuu i le suiga o le itu e feoai ai taavale i lea aso 7 o le masina fou o Setema.
“O le faanoanoaga lena o lenei vaega faaupufai pe afai o iai se agaga o le Malo e sui a latou taavale, aua o se mea e le talafeagai ma le lelei, le o mai o le Malo la e saogalemu ae feoai le mamalu o le atunuu i taavale e le atoatoa le saogalemu ona e leo suia le itu e iai foeuli o a latou taavale”, saunoa ai Lealailepule Rimoni.
“Sa saunoa lava le Palemia i le taimi na fuafua ai le suiga o le itu auala, e le suia taavale foeuli tauagavale a le atunuu atoa e aofia ai ma le Malo ae faaaoga pea seia oo ina le toe mafai ona faaaoga, ae o le a lea faaiuga ua toe faafuasei ona fai ?” Faaalia e le tasi o sui faipule o le Tautua Samoa le tofa Levaopolo Talatonu, e taugata tele le suiga ua faia pe a fua i nisi taavale fou faatoa tai lua pe tolu tausaga.
“O nisi taavale e tai $80 i le $90 afe le tau, faapefea la ona sikuea tupe a le atunuu na faatau mai ai, aua o le mea moni o le a maualalo ma pa’u le tau o le a toe faatau ese atu ai taavale foeuli tauagavale”, o le finagalo o Levaopolo i se feiloaiga ma tusitala.
O le tasi itu o loo popole ai le sui a faipule ona afai e faatino le faiga o le sui o le foeuli mai le tauagavale i le taumatau ae le faatauina, o le a maualuga se isi tau e faatino ai ma atili gaugau ai seleni a le Malo ma le atunuu na faatau mai ai ia mea totino.
Faamalamalama e le Palemia le faaiuga
“E leai se mea o le a te’ite’i vale ai fua ma le tupu o le vevesi o le atunuu, ae o le suiga ua faia e le Malo ona e iai se kamupani o loo faasalalau i nusipepa o le a mafai ona ia suia le itu e tu ai le foeuli”, na saunoa ai le Palemia susuga Tuilaepa L Sailele Malielegaoi.
O lana faamalamalamaga e faapea, e tolu filifiliga ua ave i Matagaluega ma Faalapotopotoga a le Malo e filifili ai.
Muamua, o le sui o le foeuli mai le itu tauagavale ile itu taumatau ma e le tele se tupe alu ai e pei ona saunoa Tuilaepa, faatau ese atu taavale foeuli tauagavale ise kamupani mai fafo o loo mananao iai ae sui mai i taavale foeuli taumatau pe aumai le tupe, ma le tolu o le aumai na o le vaega i luma e sui ai, ona tatala lea o le foeuli mai le isi itu ave ile isi itu.
“E feololo lava nai kamupani inisinia a tatou ua tele ai le latou galuega ile faatinoina o lena fuafuaga”, o le isi finagalo o Tuila’epa.
E manino mai i le finagalo o le taitai o le Malo o le oo mai i Samoa o se kamupani e mafai ona latou faatau taavale foeuli tauagavale, ae fesuiai i taavale foeuli taumatau poo le aumai o le tupe e toe faatau ai nisi taavale a matagaluega ma faalapotopotoga a le Malo, na mafua ona o le silasila ile faigofie ona faatino ai o se fefaatauaiga e tausisia ai e taavale a le Malo tulafono fou o le suiga o le itu auala.
E atagia foi ile faaiuga ua faia le faaaoga e le Malo o le avanoa ua oo mai ai lea kamupani, aemaise o loo mafai ona fesuiai foeuli o taavale e ui e iai tupe e alu ai.
O le a amata le suiga lenei i taavale a Minisita ma taitai o le Malo ma faauluuluga o Matagaluega ma Faalapotopotoga, ona faasolosolo ai lava lea seia oo ina maea.
