O le Aso Faraile muamua o Mati o le a tuua ai Aotearoa e sui e toalua o le mafutaga a Tina o le Perepereane mo se fono faavaomalo e faia i le aai o Niu Ioka i Amerika. O le faletua ia Faaolataga Leasi ma le susuga i le faifeau o Pamela Tangersly ua tofia e fai ma sui o Niu Sila i lea fonotaga tāua a tina.
E iai le faamoemoe e tiliva ai e le sui o le Pasefika o Faaolataga Leasi se pepa e uiga i Sauaga i totonu o aiga (Family violence). E tolu vaiaso e tuua ai Niu Sila mo le faamoemoe, ae lua vaiaso atoatoa mo le fonotaga.
O lenei fono faavaomalo e faapea pe tusa ma le 500 usufono mai malo eseese o le a aofia ai, ma ua sauni foi le aumalaga e tapena ni lipoti lelei auā le tu‘i atu o le mulipapaga e le autapuai pe a faaolatia mai i fanua le faamoemoe. Ae tatou talosia le usugafono ia faia mea uma i le manuia ma ia foi mai ma se faalumaga lelei auā tina o loo tapuai atu i fanua.
