Sui faafuasei le Tausala a Ausetalia mo le Miss Samoa

Ua tolu vaiaso o faalauiloa mai e le Televise 1 ma le Televise 3 le tamaitai o Puafuatausaga Samia, o le tausala lea a le mamalu o Samoa o loo alaala ma papaaao i Ausetalia.
Peitai e talu ona amata faalauiloa tausala i le vaiaso o le Teuila ma faatautaia asiasiga ma polokalame a le Tausala o Samoa, ua māua ai e le o iai lava lenei tamaitai i le potopotoga a tamaitai o le Tausinioga.
E tatau ona toaiva tamaitai tausinio; o le toatolu mai Ausetalia, Amerika ma Niu Sila, ma le toaono o tamaitai lava o loo aumau i le atunuu moni o Samoa, peitai e lei auai lava lenei tamaitai mai Ausetalia i ni faatasiga aloaia a tausala tauva.
O le maea ai o aso e tolu o faatasiga a tamaitai nei, ae amata loa ona fesiligia e tusitala poo fea le tamaitai tauva o Samoa mai Ausetalia.
O se telefoni mai i sui o le aiga o lenei tamaitai o loo i Aleipata, na faamautu ai loa le mafuaaga ua le vaaia ai Puafuatausaga i mafutaga faalauiloa a tamaitai tausinio o le Tausala o Samoa.
O le telefoni na oo mai i le tatou ofisa i Saleufi, na faapea mai ai le na valaau mai, e lei manao e faalauiloa o ia, “Ua e maua se faasilasilaga faalauaitele a le Komiti o le Tausala o le Teuila?” Na tali atu e leai ma faapea mai ai loa, “O lena o le a toe foi le Miss Samoa Australia ae o lea ua taunuu mai le tamaitai lea na tulaga lua i le tauvaga a Ausetalia e fai ma ona sui i le sailiga tausala.”
Na fesiligia e le Samoa Times le na valaau mai poo le a tonu lava le mafuaaga o le toe faafoi o le tamaitai na manumalo i le sailiga o le tausala a Ausetalia, ae faapea mai le na valaau mai, o ni mafuaaga tau i lea lava tamaitai ua le mafai ai ona tauva, ae o lea e faalogo e iai se fesootaiga o lenei faaiuga mai i le komiti o le tausala a Samoa i Ausetalia ma le upega o faalauiloa o le BEBO.”
Ona pau lava lea o le faamatalaga ua aumai ma le fautuaga, e sailiili ia i latou na malaga mai aemaise le tamaitai lea ua le tausinio.
O le Faletalimalo o le Millenia i Mulinuu na maua i suesuega o loo faamautu ai le tamaitai lenei o Puafuatausaga ma lana aumalaga.
E faatolu o vili i le faletalimalo faatoa maua se tina i le isi itu o le telefoni. O le faamatalaga na fai mai faapea, “E le mafai ona ou fai atu se faamatalaga e faatatau i au fesili seiloga ua oo mai Pua ae o loo alu atu i lana feau i le taulaga.”
Na faafetai i ai ma faatali sei toe foi atu. E tea le afa o le fitu i le afiafi ae faatoa maua le tamaitai lea ma ia faapea mai ai o loo i Samoa mo le tauvaga ma e tatau ona iai se pepa faalauiloa a le Komiti o le Tausala a Samoa e faatatau i au fesili, pe tausinio, pe moni o lea o le a toe foi i Ausetalia ae le tauva.
Na toe fesili loa i le tamaitai ae na o le tali mai lava i le IOE poo le LEAI foi i le fesili ua tuu atu pe afai e le mafai ona talanoa mai i le telefoni a le faletalimalo.
Na fesili loa i ai pe tauva e fai ma sui o tagatanuu Samoa o loo i Ausetalia i le faaaliga tausala o le faaiuga o le vaiaso.
O le tali a lea tamaitai e leai.
O le aso na sosoo ai ae faalauiloa mai loa e ofisa faasalalau ma nusipepa o Samoa o lea ua suia le tamaitai o le a tauva mo Ausetalia i le sailiga o se tausala o le atunuu.
Na taunuu mai ai foi ma le tamaitai ua sui tulaga nei ia Puafuatausaga Samia, o ia lea o Grace Schmidt Alai, o ia lea na tulaga lua (first runner up) o le tausala a Samoa i Ausetalia.
Faaalia le faafetai o lenei tamaitai i le mafai ai ona ofi mai i lenei tausinioga ma na tele lava le lagolago a lea tamaitai i le tausala ua le taunuu lona faamoemoe.
“O le lagolago mai ia Puafuatausaga ua faafaigofie ai le ofi mai i le tauvaga i lenei taimi,” o se faaaliga lea a Grace Schmidt ina ua fesiligia e tusitala i le suiga.
Na toe fesiligia lava poo le a tonu le mafuaaga o le aveese o Puafuatausaga ma le tausinioga ae ona pau lava le faasalalauga ua oo mai i tusitala e faapea o mafuaaga lava tau i le uluai tamaitai tauva, lea ua le mafai ai ona faaauau lona tofi o le Tausala o Ausetalia mo le Miss Samoa.
Peitai na maua lipoti, faapea o i ata i luga o le tuatusi a lea tamaitai i luga o le BeBo o lea la ua mafua ai ona maua mai le faaiuga lenei a le Komiti o le Tausala Samoa e aveese Puafuatausaga ma le tauvaga ae toe aumai Grace mai i Ausetalia e fai ma sui o le atunuu i Ausetalia mo le sailiga o se tausala o Samoa.
E leiloa la poo a tonu ata ia ua tulai mai ai le faafitauli aua e le i faalauiloa mai lea tulaga.
O le lua o tausaga talu ai na tulai mai ai foi se feeseeseaiga i le va o le Komiti o le Tausala Samoa i Ausetalia ma se tamaitai na fai ma sui o tagatanuu o Samoa i lea atunuu na tausinio foi i le sailiga o se tausala o Samoa i Apia.
E maea lea tausinioga ae maua lipoti faapea ua aveesea le pale o le Tausala Samoa o Ausetalia mai le tamaitai na malaga mai i lea tausinioga ae faaee atu i le tamaitai na tulaga lua i lea tausinioga ma na tauaveina e lea tamaitai seia maea le nofoaiga o le Tausala Samoa o lea atunuu i le tausaga na sosoo ai.