Ua tolopo nei i le aso 4 o le masina fou o Setema suesuega a le faamasinoga i le mafuaaga o le maliu o le tama na maliu, ina ua palasi i ai se pou o loo talitonuina o se meatotino a le faalapotopotoga o le malosiaga faaeletise le EPC i Maluafou i se vaitaimi o le tausaga na tea nei.
O le palasi a le pou i luga o le taavale sa malaga ai lea tama o Sekope Savaiinaea o Ausetalia ma Nofoalii faatasi ai ma lona toalua na maliu ai, ae manua tigaina lona toalua lea ua pe atoa ai lona tino poo ua paralyse.
O le ulugalii sa malaga mai mo se faalavelave faaleaiga, ae tupu ai lea faalavelave e pei ona sa finau ai le EPC ma le kamupani telefoni o le SamoaTel poo ai o laua e ana le pou sa tu i le vaega o le auala o loo lata i moli faasino ala i Maluafou ma Malifa.
O taualumaga o nei suesuega i le mafuaaga o le maliu sa faia ai le molimau a se tasi o faipule o le palemene le afioga Muagututagata Peter Ah Him, o ia lea na tu tonu lana taavale i tua mai o le taavale a le ulugalii i le taimi na palasi ai le pou ma aafia ai le taavale a le ulugalii.
E lei oo atu se isi o le EPC e fai se molimau i le mafuaaga ua tolopo ai suesuega i le masina fou.
E leai se molimau a le SamoaTel, ae o le molimau a le tuafafine o le ua maliu na taua ai na oo atu se ifoga a le EPC a o lei faia toe sauniga o lona tuagane o Sekope, lea na avatu ai se seleni o se meaalofa mo lo latou aiga.
O loo iai foi le talitonuga o a tatou tala sa totogi e le EPC le pasese o le tina na aafia i le faalavelave mo le auina atu i Ausetalia mo togafitiga.
