Ua silasila nei le komiti o faalavelave faalenatura i le faia o se suesuega pe moni lipoti e faapea ua toe faatau atu e nisi aiga o loo mafatia taga araisa ma pusapa o meaalofa mo aafiaga o le galulolo i faleoloa laiti i totonu o nuu ma afioaga o loo mafatia.
O nisi foi tuuaiga o loo silasila i ai lea komiti o lipoti e faapea o nisi o loo galulue i le tufaina o ia fesoasoani ua latou faatau atu foi nei taumafa i faleoloa i taimi e malaga ai loli ma pikiapu faapea van e tufa fesoasoani.
I ni lipoti ua faaalia ai e le taitaifono o le komiti, le susuga Taulealeausumai Laavasa Malua, ua oo atu ia lipoti ma e le o māmā i le latou laulau nei tuuaiga ona e faigata tele le alolofa mai o atunuu ma faalapotopotoga ma tagata taitoatasi ae aliali mai ni faaletonu faapea e tauvalea ai le atunuu atoa.
O le mau a tagata o le Mata Aleipata o loo sili ona mafatia i le faalavelave, ua matua pa ma soloi le taumafa faapea isi fesoasoani e pei o faleie ma tapoleni ma ua latou faafetaia ai le agalelei o tagata ma atunuu i fafo.
O loo musu se alii ofisa sinia o le Malo sa taulamua i le faasoasoaina o nei fesoasoani e faailoa mai afioaga ua lipoti atu sa aliali mai ai ia uiga le lelei o le toe faatau o meaai o fesoasoani.
O isi tulaga ua aliali mai o le faaaoga e nisi o le faailoga ma le igoa a le faalapotopotoga o le Koluse Mumu e saili ai tupe ma isi fesoasoani i le faaupuga e tuuina atu ia i latou ua aafia i le galulolo.
Ua faasalalau ai e le faalapotopotoga o le Koluse Mumu se faaaliga faalauaitele e logoina ai i latou o faia lea tulaga, i le tatau lea ona maua muamua atu se faatagaga ona faatoa mafai lea ona latou faaaoga le faailoga a le Koluse Mumu ma le igoa o le faalapotopotoga.
Ua avea lenei mala faalenatura ma ona mafatiaga ua suetupe ai foi ma nisi i le fia fesoasoani i galuega laveai o le sunami ae peitai o loo iai ma le fili i ia taumafaiga.
O loo iai le faamoemoe ia aua nei faaaoga sese e nisi mafatiaga ua feagai ma se vaega o le tatou atunuu e uu tupe ai ma latou ma fai ai lo latou ivi, ae le aumaia tonu i nai aiga ma nuu o loo mafatia.
O le molimau foi lea a nisi sa fesiligia e tusa o le tele o fesoasoani o loo faatutu mai i Samoa, e le gata mai Malo i fafo, o faalapotopotoga tumaoti, ma tagata o le atunuu o alaala i fafo. O se asiasiga i fanua tu uta o nuu ma afioaga ua faasee i ai le toatele o aiga, sa molimauina ai le tele o taga araisa, pusa saimini, ma pusaapa eleni ua maua e nai aiga, ma o le latou molimau mai, e maeu le agalelei o tagata mo latou.
Sa faaalia e se alii ofisa sinia i se tasi o matagaluega a le Malo sa auai i le faasoasoaina o fesoasoani, e uma loa le masina e tasi o loo faasafua atu ai fesoasoani i nai aiga, ona ave uma lea o taumafa ma isi vaega e teu malu i se nofoaga ina ia auauai mai ai.
O le isi itu o loo silasila i ai, ua iai nei Samoa i le tau o afa ma matagi malolosi ma e tatau ona tapenapena mamao i ai, ina nei oso mai sea faalavelave faalenatura ae o loo iai vaega ua saunia mo le manaoga o tagata lautele.