Suesue mafuaaga o le maliu o se tamaititi aoga

O loo suesueina e le pulega o aoga a le ekalesia Katoliko i Samoa le mafuaaga o le maliu o se tamaititi aoga o le aoga tulaga lua a le ekalesia o loo i Falefa lea o loo tuufaatasi ma le aoga faataitai. O lenei faalavelave i le vaiaso na tea nei na uma ai le ola o se tama aoga laititi e 6 tausaga le matua ina ua palasi ae le uamea o loo tautau ai taupega poo suigi a le fanau ma aafia ai le ulu o le ua maliu i ni manuaga tuga. E tolu taupega e tautau uma i le uamea faalava ma o loo iai le talitonuga o le mamafa o tamaiti na faaaogaina taupega i le taimi o le malologa na mafua ai ona gau ifo le uamea ma aafia ai le tama aoga ua maliu.
O le suesuega o loo faia e tatau ona iloa ai poo ua leva ona faaletonu le vaega o loo tautau ai taupega ma sa tatau ona faafou. E 400 ma ona tupu fanau o loo aoaoina i le aoga a le ekalesia Katoliko o le St Peters i Falefa ma na pau lea o se aoga a le ekalesia i lea itu o Upolu o loo aooga tausavali i ai fanau mai afioaga e pei o Luatuanuu, Falefa, Fagaloa, Aleipata, Lotofaga ma Matatufu. O se tasi lava lenei o mataupu ua taatele ona faalauiloa foi i totonu aoga aemaise foi i galuega o le tulaga tau i le saogalemu.
O Niu Sila nei o loo iai vaega uma ua maea ona tapenaina mo le fautuaina ma le faamalamalamaina o le tulaga tau le saogalemu i soo se galuega. O tulaga foi tau aoaoga ua malamalama i ai le toatele e tatau ona fautuaina le fanau i nofoaga e le tatau ona uia i soo se taimi o aoaoga aemaise ai o le aloalo ese ma nofoaga e ono afaina ai, o nisi ia o itu ua faaalia ai lagona o nisi i lenei mataupu e ao lava ona faia pea lava pea i aso taitasi ma faamanatu foi mai le matagaluega o Aoga ni nai polokalame laiti e faatatau i le saogalemu o tamaiti i totonu o aoaoga atoa ai ma le malupuipuia lelei o nofoaga o loo latou faaaogaina mo taaloga ina ia aua nei afaina ai se tamaitiiti.