O le Aso Lulu o le vaiaso nei e amata faafofoga ai le komiti o loo nafa ma mataupu tau saienetisi ma aoga a le Palemene, i finagalo faaalia a le atunuu lautele i le tāua o le aoaoina o gagana a le Pasefika i aoga amata i Niu Sila.
O le a faia lea feiloaiga e amata i le 9am seia oo i le 5pm i le Aso Lulu, 12 o Setema i le faletalimalo o le Allenby Park i 477 Great South Road, Papatoetoe. Na o i latou ua uma ona faailoa i le Ofisa a le Palemene e fia faaalia o latou finagalo i lea mataupu, ae o loo faataga soo se isi ona auai ma faafofoga i finagalo faaalia. E tāua ia te au le iai o se tapuaiga a o faaalia finagalo a nisi o le tatou atunuu i lea Komiti a le Palemene.
E tāua foi finagalo faaalia aemaise le faatāuaina o le aoaoina o le gagana Samoa ma isi gagana o atunuu o le Pasefika i aoga i Niu Sila nei auā se lumanai manuia o tatou alo ma fanau.
Na afua mai lenei mataupu ina ua faamuta e le Malo a le National i le tausaga 2010 le faatupeina o tusitusiga o le Folauga sa faaaogā auā le aoaoina o le gagana Samoa. Sa faapea foi ona faamuta e le Malo le faatupeina o tusitusiga o le Tupu sa faaaogāina e aoaoina ai gagana Samoa, Niue ma isi gagana o atunuu o le Pasefika.
Ona a‘e loa lea o se finagalo a le FAGASA, faiaoga ma mātua e faaalia so latou finagalo i le faigamalo ona ua latou talitonu ua lē fetauia lea faiga.
E tele ni fonotaga sa talo e le FAGASA, faiaoga ma mātua e faatalanoaina ai lea mataupu. O le iuga o nei fonotaga o le faia lea o se talosaga poo se ‘petition’ e talosagaina ai le faigamalo a le National ina ia faaauau pea le faatupeina o tusituisga o loo faaaogā e aoga mo le aoaoina o le gagana Samoa ma isi gagana i o tatou alo ma fanau laiti.
O le talitonuga a le FAGASA, faiaoga ma le toatele o mātua, e tāua le aoaoina o le gagana Samoa i o tatou alo ma fanau. O alo foi ma fanau o loo aoaoina i le gagana muamua a o latou mātua, o i latou foi nei e vave le malamalama ma le pueina o le gagana faaperetania.
E tele foi ni lipoti o suesuega a nisi o polofesa mai Niu Sila ma atunuu mai fafo o loo faaalia ai, o le tamaititi e malamalama i gagana e lua o se tamaititi ua malosi le faavae ua faavaeina ai lona olaga aoga.
O le amataga o le tausaga 2011 sa faasavali ai lea “petition” poo le sainigalima e talosagaina ai le faigamalo a Key ma lana vaega ina ia taofi latou faiga ma faaauau le faatupeina o le aoaoina o gagana a le Pasefika.
O faiaoga mai le Iunivesete o Aukilani o John McCafferey ma lona faletua o Judy Taligalu McFall-McCafferey, o laua ia na taulamua i le tuufaatasia o lea talosaga. Peitai ane, e le gata ua taofi e le Malo le faatupeina o le aoaoina o gagana eseese o le Pasefika, ae ua latou aveesea foi mai fuafuaga faataoto a le Matagaluega o Aoga mo le aoaoina o tamaiti Pasefika (Pacific Education Plan), le faatāuaina o le aoaoina o gagana o le Pasefika, ae ua faataoto mai na o le aoaoina o le gagana faaperetania.
O le aso 4 o Aukuso 2011 na taunuu atu ai le aumalaga mai Aukilani sa taitai atu e John McCafferey ma Judy Taligalu McFall-McCafferey ma nisi o faiaoga ma mātua matou feiloai i le Palemene. Ina ua maea le ava o le feiloaiga sa saunia e le afioga Galumalemana Alfred Hunkin, o se tasi tamaalii iloga ma faiaoga i le Iunivesete o Vitoria i Ueligitone, ma le Fono Faufautua a Samoa, sa faapea loa ona tauaao mai le sainigalima poo le petition e toeitiiti atoa le 7,000 o tagata ua latou sainia.
Sa faapea loa ona ou faaofi i le Palemene lea sainigalima mo le faatinoga o galuega, peitai, e uma lava le tausaga 2011, e lei oo i ai le silasila a le Malo i lea ‘petition’.
Ina ua toe manumalo le vaega a le National i le faigapalota, ona ou toe taumafai loa lea e unai le faigamalo e silasila toto‘a i le talosaga a le Atunuu ma vave fai i ai sa latou faaiuga.
Sa ou talosaga foi ina ia tuu le avanoa ia i latou ua sainia lea talosaga ia feiloai ai ma komiti a le Palemene. Peitai ane, sa teena e le Malo.
Ona ou manatu ai lea ia toe talosaga le Malo e auala atu i se talosaga tuusa‘o i le Komiti o loo iloiloina lea ‘petition’ ina ia faia se suesuega poo se ‘inquiry’ pe tāua le aoaoina o gagana o atunuu o le Pasefika pe leai i aoga i Niu Sila.
Na vave ioeina lau talosaga e le Malo, peitaiane, e lei fiafia i lau taumafai e faalauaitele le suesuega i ai i lea mataupu ma lou naunau atu ina ia aofia uma ai aoga mai aoga amata seia oo atu lava i le kolisi.
Fai mai le Malo e talia le talosaga ae na o aoga amata ua latou ioe i ai. Ona ou manatu ai lea ua lava lea, o le mea aupito i sili ona tāua o le maua o le avanoa a le FAGASA, faiaoga ma mātua e faaalia ai o latou finagalo i le Malo i le tāua o le aoaoina o tatou gagana i o tatou alo ma fanau.
O le Aso Lulu nei la, o le a maua ai le avanoa mo le FAGASA, faiaoga ma mātua ua muamua faailoa i le Palemene o loo fia faaalia so latou finagalo i lenei mataupu. E tāua ia te au le silasila atu o sui a le Malo faapea le Palemene, e toatele i tatou o loo faatāuaina lea mataupu.
O le mea lea afai e mafai ona outou afifio atu e tapuai i faiva o latou o le a fofogaina o latou finagalo, ma faaali le tāua o le lagolagoina o le aoaoina o gagana Samoa, ma isi gagana o le Pasefika, e tāua tele.