O loo tumutumu lava tagata i fafo o le ofisa o le K&M Travel & Services, i le tau saili o avanoa ia na taumafai e talosaga auā faigamalaga i fafo aemaise o galuega faavaitaimi i Ausetalia e pei ona faatautaia ai nisi o o latou pepa malaga.
Ae ua faigata ona toe agai i totonu o le ofisa ona o lea ua tapuni e leoleo le ofisa mo le isi lua vaiaso ona o ni suesuega e faatatau lava i talosaga nei mo faigamalaga i fafo.
O le alii pule o le ofisa malaga o le K&M Immigration Travel & Services, Sanele “Katie” Moananu lea o loo suesueina e le Matagaluega o Leoleo i ni faiga taufaasese i pepa malaga. O ni tagi ua faaoo atu i le Ofisa o Leoleo a nisi na afea lea ofisa malaga mo faigamalaga i atunuu mamao, lea ua alia‘e ai lea faaletonu.
Faaalia e le Sui Sooupu o le Matagaluega o Leoleo, Leaupepe Fatu Pula, o se tasi o mataupu e faasaga i lē ua fai i ai suesuega, o se tagi mai se tina Falevao.
O lea tina e silia ma le $1,000 tala Samoa sana tupe na totogi i le faiga o ona pepa malaga mo Niu Sila ae peitai ua leiloa poo fea tonu o loo agai i ai lana seleni.
Ta‘ua foi e Leaupepe, o se tasi o mataupu na faaulu atu, o le tagi a se tamaitai mai Vaitele-fou sa agai foi i lea ofisa malaga mo sana faigamalaga i Ausetalia. E le o mautu mai pe fia se aofai o le tinoitupe a lea tamaitai o loo aafia.
“E le fou lea tulaga, ma e iai foi nisi o ofisa malaga sa latou faia lea tulaga i le mamalu o le atunuu ma sa faaoo mai foi i le Matagaluega,” o se saunoaga lea a Leaupepe.
Na o le pau lea o le ofisa malaga sa mafai ona latou faagaioia avanoa mo nisi o le atunuu e malaga atu ai mo galuega faavaitaimi i Ausetalia i le taimi na faasalalau aloaia ai e le ofisa o le Palemia le taofia o ofisa malaga uma i le faiga o pepa malaga mo galuega faavaitaimi. O lea tulaga e mafua mai, ona sa iai se tasi o faatoaga sa fesootai i ai lē o loo tuuaia i lenei mataupu ma ave ai loa tagata o loo agai atu ia te ia mo avanoa i Ausetalia.
Faaalia e Leaupepe, ua toe alia‘e mai foi ia ituaiga mataupu, ma ua tele mataupu ua ave i ai le fesoasoani a le Matagaluega ona o le toatele e mananao e o atu Leoleo i ofisa malaga e faasaga i ai a latou tagi ina ia toe faafoi ane a latou tupe.
O le fautuaga lava a le Matagaluega o Leoleo, o le agai i ofisa malaga o Niu Sila, Ausetalia ma Amerika mo le faagaioiga o a latou pepa malaga e foia ai le tulai mai o ia mataupu.
O loo faasilasila faalauaitele mai foi e ofisa o ia atunuu le agai sa‘o atu i o latou ofisa, e aunoa ma le afea o ia kamupani ma le tulai mai o ia faiga taufaasese.
O le polokalame lava ia o galuega faavaitaimi, o loo faatautaia uma lava e le Ofisa o le Palemia ma le Kapeneta, i lona lala lea e ta‘ua o le RSE lea foi e agai ai le toatele i Niu Sila mo avanoa e galulue ai i faatoaga apu ma moli ma isi fualaau ‘aina i lea atunuu.
O lea faato‘ā lua faigamalaga mai Samoa nei ua i lalo o le polokalame lenei a le RSE mo Ausetalia. Ae o le vaega lea ua saili avanoa i le ofisa malaga e pei ona suesueina nei, e ese lava le faatoaga moli lea ua agai i ai e le o iai se fesootaiga ma le maliega i le va o le Malo o Ausetalia ma le Malo o Samoa e pei ona sainia i le faaiuga o le tausaga na tea nei.
O loo taofiofi lava foi la se faamatalaga a le pule o le K&M Travels seia mae‘a suesuega o loo faatautaia e leoleo i lo latou ofisa i le taimi lenei. Ua ia tuuaia foi nisi o lana aufaigaluega i le lē manuia ai o pepa malaga a nisi o le atunuu ua faaseā nei, ae ua tutu faatasi i latou ua tuuaia o lona ofisa ma le faamatalaga e leai lava se mafuaaga o le a tuuaia ai fua i latou i le faatautaiga o pepa malaga e pei ona faaseā ai nisi o le atunuu.
