Molia se alii pagota 21 tausaga le matua ona o ni manu‘a i lē ua maliu
Ua faatino nei e le vaega o amioga taualoa a le Matagaluega o Leoleo ma Falepuipui le Police Professional Standard Unit, ma se suesuega faalotoifale ua fesiligia ma faatalatalanoa ai leoleo o le falepuipui i Tafaigata ona o le maliu o le alii 38 tausaga mai Niu Sila o Hans Dalton.
Ua faailoa e le sooupu o le matagaluega le afioga i le Komesina lagolago, Leaupepe Lealaitagomoa Fatu Pula, o le suesuega e autu i le fia sailia o i latou na silafia le faaoo e se pagota 21 tausaga le matua, o ni manu‘a i lē ua maliu.
O le suiga lea o le tulaga ua oo i ai lenei faalavelave na tupu i le tuanai o le aso Kerisimasi o le tausaga na tea nei 2012.
I le lomiga talu ai a le tatou nusipepa sa lipotia ai se finagalo o le sui sooupu o le Matagaluega o leoleo le afioga Leaupepe Fatu Pula na ta‘ua ai e faapea o Hans na mafua ona maliu ona na pule lava i lona soifua.
Sa faavae lea faamatalaga mai leoleo ona e faapea sa tatu‘i e lē ua maliu lona ulu i le puipui sima o le potu poo se sela o le falepuipui sa ave tuu i ai mo le puipuia o lona saogalemu.
Peitai o le vaiaso ua mavae atu nei ina ua toe fesiligia leoleo na faaalia ai e le sooupu ua molia se alii 21 tausaga i le maliu o le alii o Hans Dalton. O le suesuega o loo faia e le vaega o amioga taualoa a le matagaluega o leoleo o le a iloa ai ni moliaga e molia ai leoleo na tiute i le taimi na nofo ai lē ua maliu i le falepuipui.
E lei faailoaina mai le umi o le suesuega faalotoifale o loo faia, ae ua laga‘i ni manatu o le atunuu ua faasinosinolima ai i le faatinoga o le pitolaau a leoleo i le falepuipui, ma le aafia o le soifua o lea taulealea mai Niu Sila.
E pei ona silafia o loo faatalia nei le taunuuga o se isi suesuega o loo feagai ma le Loia sili a le Malo faasaga i ni tuuaiga o gaioiga faaalatua ma gaioiga e leai se amiotonu e aafia ai le pulega o le falepuipui i Tafaigata.
O ia tuuaiga o loo faasaga foi i ni leoleo o le toese ma na tusia e se tagata e le o iloa nei poo ai, ma tuuina atu ai se tusi i le Palemia lea na ia faatonuina le faia o se suesuega.
O le sailiiliga muamua na faia e le vaega o amioga taualoa a le matagaluega o leoleo ma falepuipui, sa tuuina atu i le Loia sili mo sana fautuaga, lea ua toe faatonuina e le Loia sili e toe faia isi se isi suesuega atili.
O le maliu o Hans Dalton i le falepuipui ona sa ave tuu ai i se fautuaga a le fomai e vaaia i latou e aafia i le gasegase o le mafaufau.
O fualaau ma vai faafomai mo lea alii na sau ma ia mai Niu Sila a o iai i Samoa ma agi ai loa le afā o Eveni, na leiloloa i le taimi o le afā, le mafuaaga na vaaia ai e lona tuafafine se suiga i ona uiga ma amioga ma ave ai loa e vaaia le fomai o le mafaufau i le maota gasegase i Motootua, lea na faia le fautuaga e ave e tuu i le vaaiga a leoleo.
